Siarhieju 23 hady, jon vučycca na inžyniera i skančvaje apošni kurs. Zajmajecca muzykaj — zapisvaje pieśni pa-biełarusku.
Fota z sacyjalnych sietak
Chłopca zatrymali 14 červienia ŭ 11:20. Jon tolki pryjechaŭ z doma z Bresta, dabiraŭsia z vakzała da internata. Na nastupny dzień u jaho musiła być abarona dypłoma, i jon chacieŭ padrychtavacca. Kala ŭvachoda ŭ internat jaho spynili dvoje ŭ maskach i kiepkach. Pradstavilisia milicyjantami, paprasili prajści ź imi ŭ mašynu. Siarhiej tolki spytaŭ: «A vy mianie vierniecie?»
Nie viarnuli. Chłopca advieźli ŭ Savieckaje RUUS, a paśla — na Akreścina.
«My doŭha nie viedali, za što jaho zatrymali. Čakali, što sud budzie jašče ŭ aŭtorak, dziažuryli ŭ sudzie. Ale pasiadžeńnie pastavili na siońnia. Čas paviedamili za 10 chvilin da pačatku, a śpisy paviesili za 5 chvilin», — raspavioŭ «Našaj Nivie» siabra Siarhieja.
Na chłopca skłali pratakoł za «niepadparadkavańnie» (artykuł 24.3 KaAP). Napisali, što kali jaho zatrymali dla ŭstanaŭleńnia asoby, to jon «staŭ upiracca nahami ŭ ziamlu, chapacca za dźviery aŭtamabila».
Śviedka-milicyjant na sudzie kazaŭ, što nibyta raniej pa tym adrasie było ździejśniena złačynstva, tamu jany razam z HUBAZiKam praviarali padazronych asob. Student pryciahnuŭ uvahu, bo išoŭ z torbaj. Jany jaho spynili, kab pravieryć, ci pryciahvaŭsia raniej da adkaznaści, ci byŭ u vyšuku.
Siarhiej tłumačyŭ, što nijakaha niepadparadkavańnia nie było, jon spakojna prajšoŭ z supracoŭnikami.
«Ja pryjechaŭ, kab abaranić dypłom i źjechać dadomu jeści maminy katlety, adpracoŭvać dva hady», — kazaŭ chłopiec padčas pasiadžeńnia.
Sudździa Maryna Fiodarava vysłuchała ŭsio i vyniesła pakarańnie ŭ 15 sutak.
Dahetul Siarhieja zatrymlivali na 25 sakavika. Jon pravažaŭ dziaŭčynu na praśpiekcie Niezaležnaści. Tady jamu dali 15 sutak — častku ź ich jon pravioŭ na Akreścina, častku ŭ Žodzinie.
Siamja spytałasia ŭ dekanacie, ci zmoža Siarhiej abaranić dypłom paśla vyzvaleńnia. Tam paabiacali što-niebudź prydumać. Horšy varyjant — pryjści na abaronu praz hod.
