Ab razryvie kantraktu Nike i Niejmara abviaścili vosieńniu 2020 hoda, tady ž stała viadoma ab padpisańni brazilcam kantrakta z Puma na rekordny pa mierkach futboła hadavy hanarar u $30 młn.
«Nike spyniła adnosiny sa spartsmienam tamu što jon admaŭlaŭsia dobrasumlenna supracoŭničać u rasśledavańni śćviardžeńniaŭ, jakija zasłuhoŭvajuć davieru, ab nieprystojnych pavodzinach u dačynieńni da supracoŭnicy», — zajaviła Krejn.
Supracoŭnica kampanii ŭ 2016 hodzie paviedamiła kaleham ab sprobie Niejmara prymusić jaje da intymnych adnosin u adnym z hatelaŭ Ńju-Jorka padčas sumiesnaj pracy nad rekłamnaj kampanijaj. Adnak padała skarhu kiraŭnictvu Nike tolki ŭ 2018 hodzie, paśla čaho kampanija pačała rasśledavańnie.
Pradstaŭnik futbalista asprečyła abvinavačvańni. «Niejmar budzie rašuča abaraniacca ad biespadstaŭnych napadak u vypadku vystaŭleńnia jakich-niebudź pazovaŭ, čaho da hetaha času nie adbyłosia», — havorycca ŭ zajavie pradstaŭnikoŭ spartsmiena, u jakoj taksama adznačajecca, što pryčyny raźvitańnia z Nike byli kamiercyjnymi.
Baćka futbalista PSŽ Niejmar Santas adznačyŭ, što jaho syn nie viedaje hetuju dziaŭčynu, i nazvaŭ heta pomstaj za sychod da kankurentaŭ. «My byli ździŭleny, pačuŭšy abvinavačvańni, pakolki nichto ŭžo nie pamiataje, što adbyłosia ŭ 2016 hodzie. Heta vyhladaje vielmi dziŭna. Niejmar navat nie viedaje hetuju dziaŭčynu, naturalna, — padkreśliŭ jon. — Nike «źliŭ» heta paśla taho, jak my syšli. Dziŭna, što ŭsie, chto sychodzić ad Nike, sutykajucca z takimi abvinavačvańniami».
