Ja źjaŭlajusia biełaruskim pravaabaroncam, na praciahu apošnich 20 hadoŭ zajmajusia abaronaj pravoŭ čałavieka jak na nacyjanalnym, tak i na mižnarodnym uzroŭni, dapamahajučy adstojvać pravy ŭ Kamitecie pa pravach čałavieka AAN (KPČ AAN).
Maja mirnaja dziejnaść pa abaronie pravoŭ inšych ludziej u poŭnaj miery ŭzhadniajecca z Dekłaracyjaj AAN ab pravie i abaviazku asob, hrup i orhanaŭ hramadstva zaachvočvać i abaraniać ahulnapryznanyja pravy čałavieka i asnoŭnyja svabody, zhodna ź jakoj kožny čałaviek maje prava, indyvidualna i sumiesna ź inšymi, zaachvočvać i imknucca abaraniać i ažyćciaŭlać pravy čałavieka i asnoŭnyja svabody na nacyjanalnym i mižnarodnym uzroŭniach (Artykuł 1).
Tym nie mienš, sistemny ŭcisk pravaabaroncaŭ u Biełarusi praciahvajecca. My sutykajemsia z kryminalizacyjaj našaj mirnaj dziejnaści, padviarhajemsia sistemnamu pryhniotu i zapałochvańniu, advolnym zatrymańniam, abychodžańniu, što źnievažaje hodnaść, abmiežavańniami na pieramiaščeńnie, užyvańniem dyskryminacyi ŭ siłu svaich pierakanańniaŭ.
5 studzienia ŭ ofisie i pa miescy žycharstva majoj siamji prajšli pieratrusy z adabrańniem arhtechniki, bankaŭskich kartak i zvyš 200 kiejsaŭ represavanych udzielnikaŭ mirnych akcyj pratestaŭ 2020 hoda.
12 studzienia ŭ Minsku za anałahičnuju dapamohu achviaram represij aryštavany žurnalist Andrej Alaksandraŭ, jamu vystaŭlenaje abvinavačvańnie pavodle č. 2 artykuła 342 KK — finansavańnie hrupavych dziejańniaŭ, jakija hruba parušajuć hramadski paradak.
Z publičnaj zajavy nam. ministra MUS stała viadoma, što žurnalist sa žniŭnia minułaha hoda, atrymlivajučy hrošy z-za miažy, apłačvaŭ štrafy i rachunki za charčavańnie ŭ IČU ŭdzielnikam pratestnych akcyj. Było skazana, apłaciŭ kala 250 kvitancyj. Taksama namieśnik ministra MUS paviedamiŭ ab praviadzieńni pieratrusu ŭ ofisie adnoj ź niezarehistravanych arhanizacyj, pa vyniku jakoha budzie dadzienaja pravavaja acenka. I choć nazva arhanizacyi nie nazyvałasia, niaciažka zdahadacca, što havorka išła pra pieratrus mienavita ŭ našym ofisie, bo inšych pieratrusaŭ u hety čas u krainie nie prachodziła.
Pačynajučy sa žniŭnia minułaha hoda, ja taksama apłačvaŭ štrafy, rachunki za charčavańnie ŭ IČU i ŭ niekatorych vypadkach dziaržpošliny represavanym udzielnikam pratestnych akcyj. Budučy śpiecyjalistam u halinie prava, ja nikolki nie sumniavaŭsia ŭ pravamiernaści takoj dapamohi tady i nie sumniavajusia siońnia i voś čamu.
Častka 2 artykuła 342 Kryminalnaha kodeksa «Arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich», jakuju, mahčyma, buduć pradjaŭlać i mnie, dasłoŭna hučyć tak:
«Navučańnie ci inšaja padrychtoŭka asob dla ŭdziełu ŭ hrupavych dziejańniach, jakija hruba parušajuć hramadski paradak, a roŭna finansavańnie ci inšaje materyjalnaje zabieśpiačeńnie takoj dziejnaści pry adsutnaści prykmiet bolš ciažkaha złačynstva» — karajucca aryštam, abo pazbaŭleńniem voli na termin da dvuch hadoŭ.
Litaralny analiz nazvanaj normy kryminalnaha kodeksa dazvalaje pryjści da adzinaj vysnovy, što finansavańnie zaklučajecca ŭ pradastaŭleńni abo zbory srodkaŭ albo akazańni finansavych pasłuh z uśviedamleńniem taho, što jany pryznačany dla apłaty padrychtoŭki, viarboŭki, navučańnia i t.p. asob dla ŭdziełu ŭ hrupavych dziejańniach. Pry hetym, inšym materyjalnym zabieśpiačeńniem ličacca lubyja jaho vidy, u pryvatnaści: kupla adzieńnia, ježy, pradastaŭleńnie pamiaškańniaŭ dla žylla, zboru, praviadzieńnia zaniatkaŭ i h.d..
Adznačaju, što ja zajmaŭsia dapamohaj u apłacie administracyjnych štrafaŭ vyklučna pryciahnutym da administracyjnaj adkaznaści za ŭčynieńnie pravaparušeńnia, praduhledžanaha art. 23.34 KaAP, a taksama apłataj znachodžańnia ŭ izalatarach pry adbyćci administracyjnaha spahnańnia ŭ vyhladzie aryštu. I tut važnaja i, badaj, hałoŭnaja detal: pryciahnieńnie da administracyjnaj adkaznaści za parušeńni Zakona «Ab masavych mierapryjemstvach» vyklučaje ŭ hetych dziejańniach pratestoŭcaŭ skład kryminalnaha złačynstva!
Tym nie mienš, mianie zatrymali pa padazreńni ŭ ździajśnieńni złačynstva, praduhledžanaha č. 2 art. 342 KK, a mienavita za finansavańnie «navučańnia ci inšaj padrychtoŭki asob dla ŭdziełu ŭ hrupavych dziejańniach, jakija hruba parušajuć hramadski paradak».
U hetaj suviazi adznačaju, što finansavuju dapamohu ad mianie atrymlivali asoby, u dziejańniach jakich adsutničaŭ skład nazvanaha kryminalnaha złačynstva, bo ŭsie jany pryciahnuty da adkaznaści za administracyjnyja pravaparušeńni. Tamu ŭ maich dziejańniach adsutničaje padzieja i skład inkryminavanaha złačynstva.
Bolš taho, pa subjektyŭnaj prykmiecie č. 2 art. 342 KK ustanaŭlivaje adkaznaść za dziejańni, jakija pa svaim źmieście źjaŭlajucca chaŭruśnickimi dziejańniami ŭ arhanizacyi i ŭdziele ŭ hrupavych dziejańniach, jakija hruba parušajuć hramadski paradak. Finansavańniem ža moža być pryznana tolki dziejnaść, nakiravanaja mienavita na padrychtoŭku hrubaha parušeńnia hramadskaha paradku (finansavańnie, navučańnie, zahadzia abiacanaja vypłata ŭznaharodžańnia takim asobam, nabyćcio zbroi i h.d.).
Ja ž akazvaŭ materyjalnuju dapamohu asobam, jakija ŭžo ŭčynili administracyjnaje pravaparušeńnie albo adbyli pryznačany administracyjny aryšt, što nie źjaŭlajecca finansavańniem zabaronienaj dziejnaści pa sensie artykuła 342 KK.
Pry hetym nijakich faktaŭ pra toje, što asabista ja schilaŭ inšych asob ździajśniać administracyjnyja pravaparušeńni pry parušeńni Zakona «Ab masavych mierapryjemstvach», zahadzia abiacajučy, naprykład, apłacić štraf, dziaržpošlinu albo apłacić košt utrymańnia ŭ izalatary nie isnuje.
Ja zatrymany i ŭziaty pad vartu ŭ jakaści padazravanaha pa č. 2 art. 342 KK (karajecca aryštam abo pazbaŭleńniem voli na termin da dvuch hadoŭ).
U suviazi z hetym važna adznačyć, što ŭziaćcie pad vartu — samaja strohaja miera strymańnia i moža być pryznačanaja tolki ŭ dačynieńni da čałavieka, jaki źjaŭlajecca fihurantam pa kryminalnaj spravie, dzie praduhledžana sankcyja zvyš dvuch hadoŭ pazbaŭleńnia voli. U vyklučnych vypadkach hetaja miera strymańnia moža być prymieniena ŭ dačynieńni da padazravanaha abo abvinavačanaha pa spravach ab złačynstvach, za jakija zakonam praduhledžana pakarańnie ŭ vyhladzie pazbaŭleńnia voli na termin da dvuch hadoŭ, kali jany nie majuć pastajannaha miesca žycharstva na terytoryi Respubliki Biełaruś abo nie ŭstanoŭlena ich asoba.
Vidavočna, heta nie moj vypadak! Ja naradziŭsia i maju pastajannaje miesca žycharstva ŭ Respublicy Biełaruś, u mianie jość pastajannaja rehistracyja, siamja, uklučajučy niepaŭnaletniaje dzicia, pastajannaja praca i stabilny dachod.
Pieraličanyja abstaviny całkam vyklučajuć prymianieńnie da mianie samaj strohaj miery strymańnia ŭ vyhladzie zaklučeńnia da suda pad vartu.
