Fota z fejsbuka
Ciarod zatrymanych 5 studzienia na vulicy Łožynskaj u Minsku — kiraŭnik Asacyjacyi rekłamnych arhanizacyj Valeryj Bodnar. Pra heta Tut.by raspavioŭ jaho syn Maksim. Mužčynu ŭžo asudzili, jon aryštavany na 10 sutak.
— Učora ja ŭbačyŭ uviečary ŭ telehram-kanale, što na Łožynskaj — zatrymańni. Tam žyvuć maje maci z baćkam. Ja patelefanavaŭ maci, kab pravieryć, ci ŭsio ŭ paradku. Mama ŭstryvožyłasia, što baćka niadaŭna vyjšaŭ z doma, ale doŭha nie viartajecca. I ŭ toj ža momant mnie pryjšło paviedamleńnie ad baćki, što jon — u Pieršamajskim RUUS. Paśla hetaha dostupu da telefona ŭ jaho ŭžo nie było.
Rodnyja Valeryja Bodnara ŭčora ŭviečary źjeździli da RUUS, adnak nijakich padrabiaznaściaŭ daviedacca nie zmahli. Siońnia jany trapili na pasiadžeńnie suda.
— Źviestki ŭ pratakole i pakazańni baćki mocna adroźnivajucca. Milicyja ličyć, što jon udzielničaŭ u Maršy — niekalki dziasiatkaŭ čałaviek išli pa rajonie i kryčali «Žyvie Biełaruś». U baćki pakazańni, što jon viartaŭsia praz dvor sa svajoj štodzionnaj prahułki — u jaho prablemy sa zdaroŭjem, daktary rekamiendavali hulać. Pry im nie było nijakaj atrybutyki. Jon nie pahadziŭsia z abvinavačvańniem.
Kiraŭnika Asacyjacyi rekłamnych arhanizacyj asudzili pa č. 1 art. 23. 34 KaAP, pakarańnie — 10 sutak aryštu. Pavodle infarmacyi blizkich, jon na Akreścina.
— My paśpieli trochi ź im parazmaŭlać. Skazaŭ, što ceły, nastroj bajavy, nie markocicca, — raspavioŭ syn Maksim.
