Hetaje pytańnie abmiarkoŭvałasia siarod inšych u novym vypusku debataŭ «DysKUT», pryśviečanamu muzycy biełaruskich pratestaŭ. Pra rolu piesień, dvarovych aktyŭnaściaŭ razvažali śpiavak, muzyka Siaržuk Doŭhušaŭ i kiraŭnik Fonda kulturnaj salidarnaści, zasnavalnik partała «Tuzin Hitoŭ» Siarhiej Budkin.
Źmicier Vajciuškievič vystupaje pa płoščy Pieramien. Fota Nadziei Bužan
Mora muzykaŭ pabyvała za kratami za čas pratestaŭ, apošniaja tendencyja — zatrymańnie vykanaŭcaŭ adrazu paśla dvarovych kancertaŭ. Jak im dapamahčy?
«Heta miery biaśpieki. Kali my havorym pra dvarovyja kancerty, to jość peŭnaja achova. Jana sočyć za paradkam, kab nie pryjechali busy strašnyja. Akramia taho, ludzi mohuć zabiaśpiečyć transpartam, kudyści advieźci ci pryvieźci muzykaŭ, sustreć. Nu, pakarmić! Dy navat prosta zaprasić u hości, pasiadzieć za kubačkam kavy ŭ toj momant, kali ŭžo adyhrali muzyki. Prosta pasiadzieć, parazmaŭlać, pakul usio supakoicca, a potym pravodzić ich akuratna na transpart ci davieźci dadomu. Ja dumaju, heta samaje hałoŭnaje. Kaniečnie, časam źbirajuć danaty, heta taksama dapamahaje. Možna padumać pra heta zahadzia, kab nie treba było chadzić u časie kancertu z praciahnutaj rukoj. Ale muzyki pryjazdžajuć nie praź niejkuju karyść, adna asnoŭnaja meta — heta padtrymka dvaroŭ, žadańnie vykazać svaju pazicyju», — tłumačyć Siaržuk Doŭhušaŭ.
Jon ličyć, što vialikuju rolu ŭ prateście hraje mienavita biełaruskaja pieśnia.
«Śpiavajuć nie tolki prafiesijanały, śpiavajuć dvary, śpiavajuć ludzi, jakija raniej navat nie dumali, što jany mohuć śpiavać. Prosta źviartajucca da prafiesijanałaŭ, žadajučy razvučyć «Pahoniu», «Mahutny Boža». Hetyja pieśni stali pieśniami pratestu. Jašče dziesiać hadoŭ tamu ich bajalisia vykonvać, a zaraz jany hučać», — kaža Siaržuk.
Siarhiej Budkin adznačaje, što zaraz lubaja aktyŭnaść, luboje dziejańnie idzie hramadstvu ŭ plus.
«Kožny vykazvaje pratest u toj formie, u jakoj moža. Vyjści na bałkon sa ściažkom ci ŭklučyć u mašynie Tor Band — heta ŭžo forma pratestu. Tyja ž prahlady mulcikaŭ u dadzienych abstavinach ja b razhladaŭ jak formu samaarhanizacyi. Na hetych prahladach prysutničajuć ludzi, jany znajomiacca miž saboj, adbyvajecca abmien enierhijaj. Luboje dziejańnie pracuje na karyść, tamu što heta niejki ruch. Biaździejańnie — heta kiepska», — ličyć Siarhiej Budkin.
03:09 — muzyka natchniaje na pratest i dziejańni
04:57 — kancerty ŭ kožnym dvary
07:49 — što rabić z marazami i jak zarablać muzykam
12:55 — jak padtrymać aryštavanych i zvolnienych muzykaŭ
20:24 — jak nie bajacca prychodzić na dvarovyja kancerty
25:40 — jak dapamahčy muzykam nie hrašyma
28:44 — muzyka ŭ farmavańni nacyi
34:13 — efiekt ad žyvoha kancertu i anłajnavaha
44:18 — što muzyka daje pratestu
57:53 — muzyka — častka palityčnaha pratestu
04:10 — rola muzyki ŭ demakratyzacyi hramadstva
01:13:41 — muzyka abudziła nacyju
01:15:05 — «Naša pieśnia žyvie i budzie žyć»
