U vypusku debataŭ «DysKUT» biełaruskaje studenctva abmiarkoŭvaje stvareńnie novaha ŭsiebiełaruskaha studenckaha sajuza, jaki moh by ŭzmacnić i skansalidavać studenckija supolnaści. Tyja, što zaraz paŭsiudna ŭtvarajucca situatyŭna, stanoviačysia haračymi pulsujučymi kropkami dumak i inicyjatyŭ u supraćvahu inertnym aficyjnym strukturam.
Udzielniki debataŭ.
Aktyvist Moładzievaha błoka Daniła Łaŭrecki staić na tym, što studenctva va ŭsie časy adyhryvała važnuju rolu ŭ stanaŭleńni dziaržaŭnaści ŭ roznych krainach i sioleta ŭ Biełarusi jano taksama musić hučna zajavić svaju pazicyju. «U siońniašniaj Biełarusi studenty padniavolnyja, jość i raźmierkavańnie, i Zakon ab adterminoŭkach. Tamu Biełaruś pavinna stvaryć svoj nacyjanalny studencki sajuz», — kaža jon.
«Ale prosta stvaryć arhanizacyju — niedastatkova dla taho, kab jana dobra funkcyjanavała, — adkazvaje na heta staršynia Studenckaha Sajuza BDU Maćviej Šabalin. — Samaje składanaje pytańnie — heta prosta źjaŭleńnie takoha orhana».
«Davoli ciažka skazać, što ahromistaja masa studentaŭ aktyŭna ŭciahnutaja ŭ pratesty, — uzdymaje inšaje pytańnie staršynia Studsajuza na jurfaku BDU Pavieł Zacharčanka. — Adčuvajecca inertnaść, nie tolki ŭ dačynieńni da pratestnaha ruchu, ale i ŭ cełym da ŭniviersiteckaha žyćcia, vykazvańnia niejkaha mierkavańnia, pazicyi».
«Meta samakiravańnia — jana bolš šyrokaja. I rana ci pozna, kali my vyjdziem z hetaha palityčnaha kryzisu, nam treba budzie zajmacca čystym studenckim samakiravańniem. I kali my sfakusujemsia na palityčnych metach, jakija jość tut i ciapier, naša struktura moža akazacca niepadrychtavanaj dla dziejańniaŭ paśla», — źviartaje ŭvahu eks-staršynia Rady starast BDU Dźmitryj Baranaŭ.
«Zakonnaść ci adpaviednaść unutranym rehłamientam univiersitetaŭ ci navat Kodeksu ab adukacyi — heta druhasnaje, bo ŭ krainie pravavy defołt. Struktura pavinna vybudoŭvacca źnizu, studenty pakazali, što ŭmiejuć arhanizoŭvacca na miescach», — pierakonvaje Daniła.
«Kali heta realna masavaja studenckaja arhanizacyja, administracyi ŭ lubym razie pryjdziecca jaje zaŭvažyć i ličycca ź joj», — upeŭnienaja Liza Prakopčyk.
«Jak uvohule možna pabudavać studenckaje samakiravańnie pry dyktatury? Heta niemahčyma! Tamu jak upłyvać na situacyju? Lubymi dastupnymi sposabami: i «lehalnymi», i «pratestnymi», — tłumačyć Nasta Kryvašejeva, studentka MDŁU.
Kab zrazumieć, jak razvažajuć pradstaŭniki biełaruskaha studenctva, hladzicie vypusk «DysKUT»:
Na hetym tydni adbuducca dźvie novyja dyskusijnyja sustrečy ŭ miežach debataŭ «DysKUT», da jakich vy možacie dałučycca. Pra što jany?
Ideja dla Biełarusi: spačatku novaja Kanstytucyja ci novyja vybary | 22 kastryčnika ŭ 17:00⠀
Udzielničajuć:
— Andrej Jahoraŭ, analityk Centra jeŭrapiejskaj transfarmacyi, siabra Kaardynacyjnaj rady
— Valeryja Kaściuhova, redaktarka sajta «Našie mnienije» i «Biełaruskaha štohodnika»⠀
Spadar Andrej budzie pierakonvać, što najpierš novaja Kanstytucyja dla Biełarusi, a spadarynia Valeryja — što novyja vybary. Kaho padtrymajecie vy?⠀
Ideja dla Biełarusi: kultpratest | 23 kastryčnika ŭ 20:00
Udzielničajuć:
— Maksim Žbankoŭ, kulturołah, publicyst
— Michaił Hulin, mastak, kuratar, pierformier
Buduć razvažać pra toje, čamu ludzi nie bjuć vitryny, a čytajuć vieršy na prystupkach fiłarmonii dy słuchajuć pieśni.
Dałučajciesia! Rehistracyja na prahlad: dyskut.org
Pytańni pakidajcie ŭ kamientarach abo ŭ vašych instahram-storys dy pastach z chešteham #idejadlabiełarusi ci #dyskut_ideja.
