Skrynšot z pres-kanfierencyi
Śviatłana Aleksijevič aścierahajecca, što paśla pajezdki ŭ Jeŭropu nie zmoža viarnucca ŭ Biełaruś, i vykazałasia za bolš žorstkija sankcyi ŭ dačynieńni da biełaruskich uładaŭ. Pra heta biełaruskaja piśmieńnica zajaviła na pres-kanfierencyi fiestyvalu Taormina Book, piša Tut.by
Śviatłana Aleksijevič u hetyja vychodnyja znachodzicca ŭ horadzie Taarmina (Italija) na fiestyvali Taormina Book, dzie joj uručyli premiju Taormina Award for Literary Excellence. Pierad udziełam u fiestyvali piśmieńnica pahutaryła ź miascovaj presaj.
Na pytańnie, ci vierniecca jana paśla naviedvańnia Jeŭropy ŭ Biełaruś, Aleksijevič zajaviła, što nie płanuje zastavacca ŭ emihracyi. Paśla ŭdziełu ŭ fiestyvali na Sicylii i naviedvańnia doktara ŭ Bierlinie jana źbirajecca viarnucca ŭ Biełaruś. Ale ŭ samoj piśmieńnicy i jaje akružeńnia jość sumnievy ŭ tym, što jaje puściać u krainu. Śviatłana Aleksijevič pryznałasia, što nie pačuvajecca ŭ biaśpiecy, bo ŭsie jaje adnadumcy znachodziacca ŭ źniavoleńni abo ŭ vymušanaj emihracyi. Chutčej za ŭsio litaratar maje na ŭvazie Prezidyum Kaardynacyjnaj rady, siabram jakoj jana źjaŭlajecca.
— Ułada ŭžo pradprymała sprobu aryštavać mianie. I jana b rana ci pozna heta zrabiła. Heta varjacki stan, kali ty razumieješ, što ciabie mohuć aryštavać. Nichto z nas jašče niadaŭna nie moh u heta pavieryć — zajaviła piśmieńnica. Pry hetym jana vieryć, što ŭ niekatoraj stupieni abaraniaje jaje stanovišča nobieleŭskaha łaŭreata.
Łaŭreat Nobieleŭskaj premii vykazałasia ab tym, što adbyvajecca ŭ Biełarusi. Piśmieńnica padkreśliła, što biełarusy, jakija vychodziać na maršy, chočuć žyć tak «jak žyvuć svabodnyja ludzi».
- Ja hladžu ŭ tvar siońniašniaj moładzi, jakoj šmat na maršach svabody, i ŭspaminaju dzievianostyja hady. Tady na płoščy vychodzili my, i kryčali «Svabodu! Svabodu!». Ale my nie viedali, što heta takoje. U nas było tolki knižnaje, ramantyčnaje ŭjaŭleńnie pra svabodu. My dumali, što svaboda dzieści tam za vuhłom, ale potym uśviadomili, što šlach da svabody doŭhi i ciažki. My hetaha šlachu nie prachodzili. Za vuhłom my vyjavili tolki ekanamičnuju razruchu i varvarstva, hatovaje vysunuć hałavu ŭ luby momant — pieradaje słovy Aleksijevič Corriere della Sera.
Z adsyłkaj da nazvy adnoj sa svaich knih «U vajny nie žanočy tvar«, piśmieńnica kaža, što «revalucyja ŭ Biełarusi jak raz maje žanočy tvar». Na pieršaj linii ŭ šmattysiačnych maršach stajać žančyny, tym samym pakazvajuć svaju siłu i što ŭ adkaz na aryšty svaich mužčyn jany mohuć pieraviarnuć patryjarchalnaje hramadstva.
Nobieleŭskaja łaŭreatka taksama vykazałasia za ŭviadzieńnie bolš žorstkich sankcyj u dačynieńni da biełaruskich uładaŭ. Biełaruś u pieryjad palityčnaha kryzisu apynułasia adna, ličyć jana. Vierahodna, tamu što «pamiž Jeŭropaj i Rasijaj jość niehałosnaja damova ab tym, što Biełaruś — heta zona intaresaŭ Rasii».
