Fota 2017 hoda Siarhieja Hudzilina
Na pasiadžeńni Sojmu Partyi BNF 3 kastryčnika pryniali rezalucyju, u jakoj zaćvierdzili «darožnuju mapu» z 10 pieršačarhovych krokaŭ dziela vychadu z kryzisu i pačatku ahulnanacyjanalnaha dyjalohu, piša Radyjo Svaboda.
Pavodle BNF, Biełaruś apynułasia «ŭ hłybokim palityčnym kryzisie, jaki pastaviŭ dziaržavu na miažu isnavańnia». Dziejańni ŭładaŭ pryviali da ŭviadzieńnia sankcyjaŭ, «jakija staviać našuju krainu ŭ stan «dziaržavy-izhoja» na mižnarodnaj arenie. U sukupnaści hetki padryŭ suverenitetu pahražaje poŭnym padparadkavańniem krainy i pierachodu jaje ŭ status faktyčnaha pratektaratu Rasiei», — havorycca ŭ paviedamleńni pres-słužby partyi BNF pa vynikach pasiadžeńnia.
Ciapierašni kryzis patrabuje nieadkładnych zachadaŭ dziela deeskalacyi kanfliktu i pierachodu da mirnaha ahulnanacyjanalnaha dyjalohu, ličać u partyi BNF. U jakaści pieršačarhovych zachadaŭ, jakija b zrabili taki dyjaloh mahčymym, partyja prapanuje nastupnyja 10 krokaŭ:
- Vyzvaleńnie ŭsich, kaho biełaruskija pravaabaroncy pryznali palitviaźniami.
- Spynieńnie palityčna matyvavanych kryminalnych spraŭ, u tym liku suprać siabraŭ Kaardynacyjnaj rady pa ŭrehulavańni palityčnaha kryzisu ŭ Biełarusi, čyja dziejnaść «znachodzicca pad abaronaj kanstytucyjnaha prava hramadzian na svabodu abjadnańniaŭ».
- Spynieńnie masavych i niematyvavanych zatrymańniaŭ i sudoŭ suprać udzielnikaŭ mirnych masavych akcyjaŭ.
- Farmulavańnie pravaachoŭnymi orhanami i palityčnym kiraŭnictvam Biełarusi jasnych i niedvuchsensoŭnych harantyjaŭ biaśpieki dla tych, chto «byŭ vyšturchnuty ź Biełarusi albo vymušany chavacca ŭ zamiežžy z pryčyny apasieńniaŭ za svajo žyćcio i zdaroŭje».
- Spynieńnie ŭsich formaŭ pieraśledu i niezakonnych abmiežavańniaŭ prafesijnaj dziejnaści žurnalistaŭ i ŚMI (uklučna ź nieadkładnym adnaŭleńniem akredytacyi žurnalistaŭ zamiežnych ŚMI i admovaj ad blakavańnia veb-sajtaŭ), spynieńnie antynacyjanalnaj prapahandy i dyskredytacyi pratestoŭcaŭ i biełaruskaj symboliki ŭ dziaržaŭnych ŚMI, vydaleńnie ź ich raniej zaprošanych rasiejskich prapahandystaŭ.
- Adnaŭleńnie na pracy ŭ dziaržaŭnych orhanach, pradpryjemstvach i arhanizacyjach usich, kaho zvolnili ŭ suviazi ź ich palityčnymi pierakanańniami ci za ŭdzieł u mirnych akcyjach pratestu.
- Stvareńnie supolnaj parlamencka-hramadzkaj kamisii z udziełam pravaabarončych arhanizacyj, jakaja vyvučyć abstaviny prymianieńnia hvałtu padčas padziejaŭ žniŭnia-vieraśnia 2020 hodu i pieradaść sabranyja materyjały ŭ prakuraturu i śledčyja orhany, kab pryciahnuć da adkaznaści vinavatych u katavańniach i zabojstvach.
- Zabieśpiačeńnie dostupu ekspertaŭ AAN da manitorynhu ŭmovaŭ utrymańnia ŭ miescach niavoli i supraca dziaržaŭnych orhanaŭ z užo pryznačanymi strukturami Rady pa pravach čałavieka AAN i ABSE dziela abjektyŭnaha vyvučeńnia i dakumentavańnia padziejaŭ žniŭnia-vieraśnia 2020 hodu.
- Praviadzieńnie z udziełam Pałaty pradstaŭnikoŭ i inšych dziaržaŭnych orhanaŭ i palityčnych partyjaŭ narady, na jakoj vypracujuć farmat, hrafik praviadzieńnia, paradak dnia ahulnanacyjanalnaha dyjalohu, koła ŭdzielnikaŭ i mahčymych pasiarednikaŭ.
- Reforma vybarčaha zakanadaŭstva z ulikam prapanovaŭ misijaŭ nazirańnia ABSE na vybarach 2015—2019 hadoŭ i prapanovaŭ nacyjanalnych naziralnikaŭ kampanii «Prava vybaru» z nastupnym praviadzieńniem vybaraŭ usich uzroŭniaŭ pa novych praviłach i z novym składam vybarčych kamisij.
Hetyja kroki dazvolać pieraadoleć najbolš značnyja nehatyŭnyja nastupstvy kryzisu, spyniać raskoł hramadztva i «prypyniać spaŭzańnie krainy ŭ biezdań», ličać u BNF i zaklikajuć usie palityčnyja siły i dziaržaŭnyja orhany «prajavić hramadzianskuju śpiełaść i nieadkładna raspačać realizacyju paznačanaj paśladoŭnaści krokaŭ dziela najchutčejšaj stabilizacyi abstanoŭki ŭ krainie».