28 vieraśnia studenty Hrodzienskaha dziaržaŭnaha ŭniviersiteta imia Ja. Kupały sabralisia, kab śpiavać razam. Akcyja nie adbyłasia, ale dvaich udzielnikaŭ zatrymali. U 15:00 kala korpusa fiłałahičnaha fakulteta na Lenina, 32 sabralisia siem studentaŭ. «Nas było nie tak šmat, było pryniata rašeńnie prosta stajać», — raspavioŭ Hrodna.life adzin z tych, chto tam byŭ.
Spačatku da studentaŭ padyšła žančyna z administracyi ŭniviersiteta. Jana kazała pra toje, što ŭsie studenty siadziać na parach, a nie śpiavajuć. Taksama jana pasprabavała advieści ŭbok adnu z udzielnic, raspavioŭ inšy śviedka.
Studenty adyšli bližej da prypynku niedaloka ad korpusa. Da chłopcaŭ padyšoŭ čałaviek u formie achoŭnika ŭniviersiteta. «Nibyta z dobrych namieraŭ jon paraiŭ nam stajać nie kala ŭniviersiteta, a pa druhi bok ad darohi. Maŭlaŭ, nas tak budzie lepš vidać, i nam budzie zručniej. My vyrašyli zastacca, dzie stajali», — raspavioŭ adzin sa studentaŭ. Potym studenty stali razychodzicca, bo vyrašyli, što ich zanadta mała dla akcyi. U hety čas u ich bok pajechaŭ milicejski busik, jaki ŭvieś hety čas stajaŭ pobač z vučebnym korpusam.
Kala 15:30 dvaich, chłopca i dziaŭčynu, adviali ŭ bok nieviadomyja ŭ cyvilnym. Padvyšajučy hołas, jany pahražali zavieźci studentaŭ u RAUS Leninskaha rajona na vulicu Dubko. Potym jany paviali studentaŭ u bok mašyny. Paźniej stała viadoma, što maładych ludziej sapraŭdy zatrymali.
Studenty ŭpeŭnienyja, što milicyju vyklikaŭ niechta z administracyi ŭniviersiteta. Pa ich słovach, heta adbyvałasia i raniej.
25 vieraśnia stała viadoma, što studentaŭ z aktyŭnaj hramadzianskaj pazicyjaj vyklikajuć na dyscyplinarnuju kamisiju i pahražajuć vyklučeńniem z vnu. Ich raspaznavali pa fatahrafijach z akcyj pratestu, akcyj salidarnaści. Studenty Kupałaŭskaha ŭniviersiteta śpiavali pieśni na Ažeški, na Kastryčnickaj, źbiralisia la korpusa muzykaŭ na Tyzienhaŭza i rabili zdymki z tabličkami «Usio zabaroniena», stajali ŭ łancuhu salidarnaści la hałoŭnaha korpusa ŭniviersiteta. Jany pratestavali suprać hvałtu, falsifikacyj padčas vybaraŭ, cisku na navučencaŭ.
Studenty-aktyvisty jašče ŭ žniŭni na sustrečy z rektarkaj atrymali ad jaje adkaz na toje, ci buduć pahražać navučencam vyklučeńniem. Tady rektarka paabiacała, što ničoha takoha adbyvacca nie budzie.
