«Hetym letam, kali nie zastałosia abyjakavych da taho, što adbyvajecca navokał, pieśnia «My hieroi» pryśviačajecca ludziam, jakija nie zdajucca», — adznačajuć frontmeny rok-hurtu Litesound braty Karakiny. Papularny kalektyŭ pierakłaŭ na biełaruskuju movu i vykłaŭ u šyroki dostup svoj hit We Are the Heroes, ź jakim pradstaŭlaŭ Biełaruś na konkursie Eurovision-2012, piša «Radyjo Svaboda».
Litesound — rok-hurt, zasnavany ŭ 2005 hodzie Dźmitryjem i Ŭładzimieram Karakinymi. Chłopcy ŭdzielničajuć u roznych muzyčnych prajektach, supracoŭničajuć ź biełaruskimi i zamiežnymi kampazytarami i vykanaŭcami jak aranžavalniki, aŭtary piesień, pradusary.
«Niemahčyma pryniać ciapierašniaje samačynstva»
«Ideja biełaruskamoŭnaj versii We Are the Heroes naradziłasia jašče tady, jak źjaviłasia pieśnia, — raskazaŭ «Svabodzie» vakalist Litesound Dźmitry Karakin. — Navat abviaścili konkurs na najlepšy adaptavany tekst, spynilisia na varyjancie «My hieroi» Mikity Najdzionava.
Choć vierš byŭ hatovy ŭ 2018 hodzie, zapisali tolki ciapier. I, zdajecca, pieśnia prosta idealna lehła na ŭsie apošnija padziei. Hetki kryk dušy, bo emocyi sapraŭdy zaškalvajuć. Niemahčyma na ŭsio hetaje samačynstva hladzieć, chočacca ludziej padtrymać, vykazać im svaju salidarnaść».
Da hetaha ŭdzielniki Litesound zastavalisia bolš-mienš pasiŭnymi ŭ palityčnym žyćci, zasiarodžvajučysia na tvorčaści. Adnak padziei hetaha hodu stali pierałomnymi, havoryć Dźmitry Karakin. Pačałosia ź niepryznańnia ŭładami karanavirusu i «receptaŭ lačeńnia» ad kiraŭnika krainy, zatym mabilizacyja na subotnik, apošniaj kroplaj staŭ vajskovy parad.
«Prosta dzivić reakcyja kiraŭnictva krainy. Naš lider vyrašyŭ nie admianiać parad u honar 75-hodździa pieramohi ŭ Miensku. Niama ničoha bolš cyničnaha, čym brazhać zbrojaj u toj momant, kali ŭvieś śviet zmahajecca ź biadoj, admianiŭšy Alimpijskija hulni, «Eŭraviziju» i h. d. Marnujucca vielizarnyja hrošy. Niaŭžo ŭłada nia zdolnaja pryniać adzinaje pravilnaje rašeńnie: admianić parad i razdać hrošy veteranam, jakich i tak zastałosia zusim mała? Zamiest taho, kab padstaŭlać starych ludziej pad niepatrebnuju ryzyku», — emacyjna napisaŭ jon na staroncy ŭ Facebook.
A kali da pandemii dadałasia prezydenckaja kampanija z brutalnymi zatrymańniami i milicejskim hvałtam, Dźmitry Karakin paraŭnaŭ heta ź «pieradvybarnym dzikunstvam».
«Luby zdarovy čałaviek razumieje: nie pavinna parušacca Kanstytucyja, jak heta adbyvajecca ŭ nas na pastajannaj asnovie, — tłumačyć muzyka pryčyny «palityzacyi». — Dla luboj krainy narmalna vykazvać svaju dumku pra ŭładu, krytykavać jaje, kali zasłužyła, — heta nie złačynstva. A kali bačym bieśpierapynnaje parušeńnie pravoŭ — ad svabody słova da mahčymaści ŭdziełu ŭ vybarach — maŭčać nielha. Što tyčycca zatrymańniaŭ padčas pikietu ci ŭ čarzie da kramy, heta dzikunstva. Ciešyć, što biełarusy ŭ balšyni svajoj salidarnyja ŭ asudžeńni takich dziejańniaŭ».
«Siońnia realna strašna za svajo žyćcio»
Muzyka ličyć nienarmalnaj sytuacyju, kali ŭ eŭrapiejskaj krainie XXI stahodździa ludzi bajacca za svajo žyćcio: pravaachoŭniki, zamiest taho, kab stajać na varcie, sami ŭčyniajuć hvałt u dačynieńni da svaich ža suajčyńnikaŭ.
«Biezumoŭna, mnohija jašče bajacca padavać hołas, bo realna strašna za svajo žyćcio — ty absalutna biezabaronny pierad systemaj, — praciahvaje Dźmitry Karakin. — Tamu vielmi chočacca, kab usio ŭrešcie źmianiłasia da lepšaha. Pytańnie navat nie ŭ palitycy, nia ŭ tym, chto maje racyju, a chto vinavaty. Prosta tak nie pavinna być u cyvilizavanaj dziaržavie. Heta ŭžo niejkaje drymučaje ciemrašalstva».
Mnohim tvorcam, jakija aśmielvajucca krytykavać siłavyja metady neŭtralizacyi apanentaŭ, na roznych uzroŭniach pačynajuć čynić barjery. Tak, pieramožcu «Słavianskaha bazaru-2016» Alaksieja Hrosa paśla niekalkich pastoŭ z asudžeńniem aryštaŭ Viktara Babaryki i Siarhieja Cichanoŭskaha vykraślili z uchvalenych kancertnych prahramaŭ, a ŭrešcie vyklučyli z Universytetu kultury. Dźmitry Karakin kaža, što analahičnyja sankcyi ŭžytyja i suprać Litesound.
«Dy nas nas užo adusiul pazdymali, — kaža jon. — Było zaprašeńnie na Dzień Respubliki 3 lipienia, arhumentavali, što Ministerstva kultury našaha ŭdziełu nie paćvierdziła. Planavali vystup na siaredzinu miesiaca — miarkujučy pa ŭsim, taksama admianiajecca. I heta pačałosia litaralna paśla pieršych vykazvańniaŭ u sacsietkach, choć pazycyja dastatkova neŭtralnaja, uzvažanaja, biez anijakich zaklikaŭ na barykady. Prosta pytańni da taho, što adbyvajecca — naturalna, uchvaleńnia hvałtu być nie mahło apryjory. Zrešty, nia pieršy raz nam staviać pałki, tamu ŭjaŭlajem, jak heta vyhladaje».
«Falsyfikujuć navat adbor na Eurovision»
Karjera bratoŭ Karakinych pačałasia ŭ 2002 hodzie z akustyčnaha duetu ŭ Kitai, dzie tady žyli baćki. Hrali ŭ klubach, universyteckich kampusach. Jany stali pryzerami festyvalaŭ «Modern Rock Bands Competition» u Kitai, «MOVA songwriters ʼcompetition 2002» u ZŠA. Dźmitry nieadnarazova pieramahaŭ na vakalnych konkursach. U 2005 hodzie chłopcy pačali vystupać pad nazvaj Litesound. Hurt staŭ paśpiachovym, vykonvajučy anhielskamoŭnyja pieśni.
U 2006-m Litesound uziali pieršaje miesca na konkursie Festival Internazionale di Maiori ŭ Italii. Nieŭzabavie była zapisanaja pieśnia Solo Per Te sumiesna ź italjanskim rokieram Jakopa Masa (Jacopo Massa), jakaja ŭ Italii 20 tydniaŭ zastavałasia na viaršyni hit-paradaŭ.
U kancy 2008-ha źjaviŭsia debiutny albom Going to Hollywood («Pa darozie ŭ Halivud»), jaki ŭvajšoŭ u trojku samych pradavanych u Biełarusi. Pieśni Litesound traplali ŭ lik uhanaravanych premijaj «Pieśnia hodu Biełarusi», kalektyŭ zaprašali na «Słavianski bazar», jany pieramahali na feście «Ambasovišča». U 2010-m razam ź Jakopa Masa pradstaŭlali Biełaruś na mižnarodnym konkursie «Novaja chvala» ŭ Jurmale, atrymali zvańnie laŭreataŭ.
U 2011-m klip na pieśniu See you in Vegas udastojeny Nacyjanalnaj muzyčnaj premii ŭ naminacyi «Najlepšy klip hodu».
Kalektyŭ piać razoŭ zajaŭlaŭsia na «Eŭrafest», pieramožca jakoha atrymlivaŭ šaniec vystupić na papularnym konkursie Eurovision. Kožny raz nie chapała zusim krychu. A ŭ 2012-m padčas adboru na «Eŭraviziju» ŭ Baku zdaryŭsia skandał. U finale jany stali druhimi, nabraŭšy 22 bały z 24 mahčymych. Udzielniki hurtu i prychilniki abvinavacili žury ŭ falsyfikacyjach. Dałučyŭsia navat Alaksandar Łukašenka, jaki daručyŭ stvaryć kamisiju dla pieraliku hałasoŭ. Vyśvietliłasia, što vyniki sapraŭdy byli «pierakručanyja» na karyść Aleny Łanskoj.
Paśla pravierki pieramožcam aficyjna pryznali hurt Litesound, jakomu i sudździ, i telehledačy addali pa 12 bałaŭ. Braty Karakiny ź pieśniaj We Are the Heroes pajechali ŭ Azerbajdžan, a kiraŭnictva «Biełtleradyjokampanii» paśla hetaha «zabaniła» artystaŭ — ad taho času jany na Makajonka, 9 persony non-hrata.
«Praŭda na našym baku, našaje sumleńnie čystaje»
I choć spraviadlivaść adnaviłasia, ci prezydenckaja sprava zajmacca adboram na śpieŭny konkurs? Absurd, ličyć Dźmitry Karakin.
«Isnaja systema ŭłady vystrajena takim čynam, što ničoha nia robicca biez kiraŭnika dziaržavy. Za minułyja čverć stahodździa heta stała całkam vidavočna. Ni bulbu pierabrać nia mohuć, ni vadu adfiltravać. Heta niezvyčajna i nienarmalna dla čałavieka na pasadzie prezydenta ŭ inšych krainach. Pieršyja asoby nie pavinny zajmacca adborami kandydataŭ na śpieŭnyja konkursy dy inšymi spravami, dla jakich jość admysłovyja ludzi i, samaje hałoŭnaje, zrazumiełyja i prazrystyja pracedury. Kali ŭsio budzie vykonvacca, to nie spatrebicca nijakich raznosaŭ pastfaktum».
Niahledziačy na ścipłaje miesca ŭ Baku, na pačatku 2013 hodu Litesound atrymali prestyžnuju premiju Eurostar Award, nabraŭšy amal 15 tysiač hałasoŭ i tym samym apiaredziŭšy pieramožcu «Eŭravizii-2012» Loreen na 10 tysiač hałasoŭ. Heta pieršy vypadak u historyi premii, kali jaje ŭładalnikam stali artysty, jakija nie prajšli ŭ asnoŭny finał konkursu.
U 2018 hodzie vyjšaŭ druhi albom z 18 trekami. Kamanda šmat hastraluje ŭ Eŭropie, ale ŭsio mieniej zapatrabavanaja na radzimie. Letaś Litesound zmahalisia za ŭdzieł u cyrymonii zakryćcia II Eŭrapiejskich hulniaŭ. Ich pieśnia Champion vyjšła ŭ druhi tur, pieramahła ŭ hladackim hałasavańni i rašeńniem žury zamacavałasia ŭ trojcy pieramožcaŭ. Adnak za niekalki dzion da padziei vystup hurtu byŭ skasavany arhanizatarami. Paśla vykazvańnia hramadzianskaj pazycyi ŭ časie sioletniaj vybarnaj kampanii nie prymusili doŭha čakać novyja «muzyčnyja sankcyi».
Zrešty, vymušanuju paŭzu muzyki źbirajucca vykarystać z maksymalnym plonam. Najpierš zavieršyć pracu nad čarhovym albomam.
«U nas vialikaja kolkaść tvorčych idejaŭ, zadumaŭ, — padsumoŭvaje vakalist Litesound Dźmitry Karakin. — Ciapier budzie bolš času zaniacca svaim trecim albomam. Šmat piesień patrabujuć zapisu, nijakimi sankcyjami hety praces užo nia spyniš. Praŭda na našym baku, našaje sumleńnie čystaje. A staŭleńnie da taho, što adbyvajecca navokał, vykazali svaim himnam «My hieroi». Na žal, u krainie ŭsio nastolki zakanservavałasia, što našyja teksty aktualnyja i praz hady. A jašče ŭściešanyja, što narešcie Litesound zahučaŭ i pa-biełarusku…»
«My hieroi»
Kali ź nieba adlataje noč,
Nie spyniajsia ŭ darozie.
Kali śviet ciabie nia čuje bolš,
Nie zdavajsia, ty ŭsio zmožaš,
Bo ty nie adzin,
my suprać ich,
Budź pobač i,
kab nam pieramahčy,
U toj dzień, kali niama nadziej,
Ja znajdu jaje…
Što b ni supraćstajała mnie,
Ja viedaŭ i raniej,
Što my hieroi razam z taboju.
Uzhadvaju čaściej.
Niama niazłomnych ścien.
My tyja, chto vieryć i kročyć napierad.
I pierajnačyć los,
I zapavolić čas,
Kranajučy promni.
Hałoŭnaje, pomni:
Niama niazłomnych ścien,
Bo my hieroi.
U niabiosach zorki nie źliču,
I hublajecca hravitacyja,
Što, zdajecca, lohka palaču,
Kali ŭsio vakoł pračynajecca.
Ty nie adzin, my suprać ich,
Budź pobač i, kab nam pieramahčy,
U toj dzień, kali niama nadziej,
Ja znajdu jaje…
