Zadača pa pavieličeńni siaredniaha zarobku ŭ krainie da 500 dalaraŭ pavinna vykonvacca bieź piarečańniaŭ. Pra heta zajaviła kiraŭnik administracyi prezidenta Natalla Kačanava padčas sustrečy z kalektyvam AAT «Słucki cukrovarafinadny kambinat».
fota pres-słužby ŭrada
«Zarabotnaja płata ŭ siarednim pa krainie pavinna być 500. Heta zadača, pastaŭlenaja kiraŭnikom dziaržavy, pavinna vykonvacca bieź piarečańniaŭ. I siońnia heta zadača nie tolki dla ŭrada, ministerstvaŭ i viedamstvaŭ, a dla kožnaha kiraŭnika kožnaj arhanizacyi», - padkreśliła Natalla Kačanava.
Pavodle jaje słoŭ, ciapier dziaržorhany pracujuć nad tym, jak jaje realizavać. Pry hetym jana adznačyła, što ŭ Minsku hety pakazčyk pa siaredniaj zarpłacie užo dasiahnuty. Adznačym, što akramia minčukoŭ «pa 500» atrymlivajuć jašče ŭ Salihorskim rajonie.
Nahadajem, u listapadzie minułaha hoda prezident daručyŭ viarnuć siaredni zarobak na ŭzrovień 500 dalaraŭ u 2017 hodzie. Ale z umovaj adpaviednaha rostu pradukcyjnaści pracy. Apošni raz takuju zarpłatu biełarusy atrymlivali ŭ śniežni 2014 hoda. Paźniej ministr ekanomiki Uładzimir Zinoŭski zajaviŭ, što zarobak u 500 dalaraŭ - «vielmi ciažkaja zadača».
Jak viadoma, siaredniaja zarpłata za śniežań pa krainie pieravysiła 400 dalaraŭ, adnak treba ŭličvać, što jana, jak praviła, utrymlivaje hadavyja bonusy i vypłaty rabotnikam. U studzieni zarobki biełarusaŭ tradycyjna źnižajucca. U listapadzie ž minułaha hoda ŭ siarednim my zarablali 370 dołaraŭ.
