Absalutnym lidaram u Biełarusi pa prakacie multfilmaŭ za ŭsie časy stała stužka «Źvierapolis». U śviecie jon taksama maje niemały pośpiech, jašče nivodnaja animacyja «Dysneja» nie startavała nastolki dobra.
Siužet multfilma prosty. Źvierapolis — heta idealny horad u žyviolnym śviecie, dzie razam užyvajucca pradstaŭniki ŭsich vidaŭ. Tyja, chto zvyksia da pustyni, i tyja, chto lubić Arktyku, žyrafy i burazubki, travajednyja i drapiežniki. Źviary žyvuć u zhodzie, a horad kvitnieje.
Trusicha Džudzi Choŭp ź nievialikaha haradka Małyja Norki ź dziacinstva maryć stać palicyjantam, ale da jaje jašče nivodny trus nie stanaviŭsia detektyvam palicyi. Heta praca dla bujnych žyvioł — bykoŭ, ilvoŭ, krakadziłaŭ. Ź pieršych dzion u palicyi Džudzi sutykajecca z dyskryminacyjaj. Zamiest rasśledavańnia surjoznych złačynstvaŭ jaje adpraŭlać štrafavać kiroŭcaŭ za niapravilnuju parkoŭku.
Adnak u vyniku Džudzi ŭdajecca atrymać sapraŭdy cikavuju spravu, jakaja budzie mieć niečakanyja nastupstvy. U rasśledavańni joj dapamahaje drobny žulik, lis Nik Uajld. Na lisic u Źvierapolisie ŭvohule hladziać jak na całkam stračanych dla hramadstva elemientaŭ. Bo ŭsie lisy — maniuki, machlary i šarłatany. Nivodzin narmalny źvier nie budzie mieć spravy ź lisam.
Amierykanskija mulciki apošnich hadoŭ nie prosta raskazvajuć cikavuju, jarkuju historyju, ale vučać dziaciej bazavym pryncypam demakratyi i pravoŭ čałavieka.
«Źvierapolis» vučyć, što kožny, niezaležna ad rostu, siły, połu, miesca naradžeńnia, moža dasiahać pośpiechaŭ u luboj śfiery. Choć asiarodździe moža varoža stavicca da takich inicyjatyŭ.
A jašče «Źvierapolis» pakazvaje, što pradstaŭnikoŭ adnoj hrupy nielha sudzić tolki za ich pachodžańnie. Cikavaja scena, kali travajednyja žychary Źvierapolisa dryžać u mietro, kali pobač ź imi jedzie drapiežnik. Šmat u čym nahadvaje isteryju vakoł musulman.
Darečy, hałoŭnym złodziejem u mulciku akazvajecca nie niechta ź ikłami i kipciurami, a toj, u kaho samaja biełaja i puchnataja poŭść.
Ale dzieciam zusim nie abaviazkova bačyć u multfilmie hetyja aluzii ź siońniašnim časam, jon prosta začepić zachaplalnym siužetam. «Źvierapolis» budzie daspadoby ŭsim: i dzieciam, i darosłym.
