Raskosmas straciŭ kantrol nad navukova-daśledčym spadarožnikam «Faton-M», jaki 19 lipienia byŭ zapuščany z kasmadroma Bajkanur.
Kaśmičny aparat vyjšaŭ sa stroju ŭ pieršyja dni palotu, paviedamlajuć «Iźviestija».
«Telemietryja z «Fatona»prychodzić, ale kamandy jon nie ŭsprymaje. Kazać pra stratu rana, jašče jość šancy na adnaŭleńnie suviazi, ale ŭ lubym vypadku vykanańnie prahramy zapłanavanych navukovych ekśpierymientaŭ užo pad pahrozaj», — paviedamiła krynica ŭ Raskosmasie.
Kiraŭnik departamienta infarmacyjnaj palityki Roskosmosa Ała Razuvajeva nie stała kamientavać dadzienuju situacyju, adznačyŭšy, što nieŭzabavie pa «Fatonie-M» moža być vypuščana asobnaje paviedamleńnie.
«Faton-M» pryznačany dla praviadzieńnia va ŭmovach mikrahravitacyi ekśpierymientaŭ, jakija zabiaśpiečvajuć atrymańnie novych viedaŭ pa fizicy biazvažkaści.
Na aparacie ŭ kosmas byli adpraŭlenyja piać hiekonaŭ: čatyry samki i adzin samiec, a taksama šmatlikija muchi-drazafiły, mikraarhanizmy, hryby, jajki šaŭkaprada i nasieńnie vyšejšych raślin. Płanavałasia, što spadarožnik adpracuje na arbicie nie mienš za dva miesiacy, paśla čaho bijakapsuła z žyvymi arhanizmami pavinna była viarnucca nazad na Ziamlu.