Prykoły ad «levaj» partyi BSDP (NH) napružvajuć nia mienš za zababony Mienharvykankamu, što zabaraniaje prodaž piva napiaredadni futbolnych sustrečaŭ.
14 kastryčnika Vykanaŭčaje biuro BSDP (NH) pryniało notu pratestu suprać pryvatyzacyi «Biełtranshazu». Voś adna z pryčynaŭ: «Paśla pierachodu Biełarusi na eŭrapiejskija standarty ŭźniknie pytańnie ab restytucyjnych kampensacyjach byłym uładaram ziamli, asabliva ŭ Zachodniaj Biełarusi, dzie mnohija jašče zachavali dakumenty na svaje ŭčastki».
Paznajomiŭšysia z esdekaŭskim «adkazam Čemberlenu», padumaŭ: mahčyma, navat dobra, što stalinskija katy hetak brutalna, biaz sudu i śledztva, mačyli sacyjalistaŭ — ajcoŭ-zasnavalnikaŭ BNR. Vidavočna, apošnija zhinuli niedzie ŭ kurapackich jarach, nie paśpieŭšy pryniać pryčaście. I ništo nie pieraškodzić ichnym niesupakojenym dušam zavitać na ahieńčyk da pravadyra BSDP (NH) Mikoły Statkieviča. Partyja ž pretenduje na status aficyjnaha pierajemnika tahačasnych levych. Jakaja cikavaja, u styli «Dzikaha palavańnia», mahła b adbycca scena.
Za voknami kvatery Statkieviča čujecca jenk: «Statkievič, vychodź! Bernštejn u apošnim kalenie, vychodź!»
— A chto tut?! — kryčyć ašaleła Mikoła.
— Nie pužajsia. My nie ad Karala, — kaža pradstaŭnik bieścialesnaha ŭradu BNR. — Ty skažy, tavaryš, čamu ty ŭstaŭnyja hramaty BNR parušaješ?
— Jakija hramaty? — zaikajecca sp.Mikoła, namacvajučy rukoj mabilnik, kab nabrać numar kantory «Palaŭničych na pryvidaŭ».
— Nia budź idyjotam. Punkt ustaŭnoj hramaty ab sacyjalizacyi ziamli ŭ Biełarusi...
Jašče fantomy mahli b paviesialić sp.Statkieviča zabaŭnaj ličbalohijaj. Naprykład, ličba 1,7%. Taki adsotak nasielnictva Zachodniaj Biełarusi (pavodle Biełaruskaj histaryčnaj encyklapedyi) składała klasa pamieščykaŭ, jakaja vałodała 55% ziamli. Plus sotni asadnikaŭ, jakich Varšava sialiła na kresach u metach kalanizacyi. Miarkuju, nacyjanalny skład zachodniebiełaruskich fazendejras i rabyniaŭ Izaŭraŭ, jakija na ich harbacilisia, nie vyklikaje sumnievu. Klijentaŭ Viaroŭkina-Šaluty (dyrektar biełaruskaha šlachieckaha NGO) tam było niašmat.
Latyfundysty mohuć znajścisia i na ŭschodzie. Niadaŭna ŭ Homiel na adkryćcio muzejnaj ekspazycyi hrafa Paskieviča pryjaždžaŭ z Maskvy vypładak słavutaha rodu. Kolki hadoŭ prajšło, a nie zabyŭsia pra svoj falvarak. Ujaŭlaju, jakim śviatam dla jaho i ŭsiaho «Rośsijskoho dvorianskoha kłuba» budzie dzień prychodu BSDP (NH) da ŭłady.
Fetyšyzm pryvatnaj ułasnaści nad pravami asoby i hramadztva — marazm, ad jakoha biełaruskim levym treba pazbaŭlacca. Heta daŭno zrazumieli zamiežnyja kalehi Statkieviča. Kvaśnieŭski nakłaŭ veta na zakon ab restytucyjach u Polščy. Krainie, u jakoj 20% pracazdolnych — biespracoŭnyja, nie da hetaha. Zachavali ŭ dobrym stanie dakumenty ab byłoj ułasnaści i sudeckija niemcy, jakich Beneš vyturyŭ z Čechii ŭ 45-m. Ale čamuści Praha nie śpiašajecca viartać im falvarki.
A mo ja najechaŭ na Statkieviča darma? Što kali vałtuźnia BSDP (NH) vakoł intaresaŭ byłych ułaśnikaŭ — paprostu chitry truk, jaki maje na mecie dapamahčy pbnkam? Prykład byłoj HDR, dzie byŭ pryniaty zakon ab restytucyjach, śviedčyć: padčas maštabnaha pierachodu majomaści z ruk u ruki ŭźnikaje žudasny pravavy chaos. Starych žycharoŭ palicyja z budynku ŭžo vykinuła, a novy haspadar, jakoha vajna zakinuła na Vostraŭ karaleŭskich pinhvinaŭ, jašče nie pryjechaŭ. A ŭvohule na dom pretendujuć niekalki asobaŭ. Momantam karystajucca panki, jakija zachoplivajuć pustyja budynki, pieratvarajučy ich u načležki i padpolnyja rok-kluby. Kali niešta padobnaje možna budzie raskrucić u Biełarusi, my staniem novym Bronksam, novym Kinh-Krosam, suśvietnaj metrapolijaj panku! Kali tak, daješ restytucyi! Punk not dead!
Lolik Uškin,lider levych radykałaŭ
