Siońnia Minsk raźvitajecca ź lehiendarnym kiraŭnikom «Tałaki». Fotafakt: ślapy Vituška viadzie ekskursiju pa Vilni 5

Panichida za Siarhieja Vitušku i raźvitańnie ź im adbudziecca ŭ Minsku ŭ sieradu 4 lipienia a 12.00 u hreka-katalickim chramie ŭ dušpastyrskim Centry Śviatoha Jazepa (vuł. Ardžanikidze, d. 6, st.m. «Aŭtazavodskaja»).

Navat aślepnuŭšy, Siaržuk Vituška vadziŭ ekskursii pa biełaruskich miaścinach Vilni. Heta byŭ čałaviek vyklučnaj erudycyi, biaskoncaj intelihientnaści i poŭnaj addanaści Biełarusi. Fota Taćciany Raviaki.

Siaržuk Vituška pamior u vilenskaj lakarni ŭranku 2 lipienia. Jon byŭ kiraŭnikom lehiendarnaj mienskaj «Tałaki» — adnoj ź pieršych paŭpadpolnych niezaležnickich arhanizacyj u časy SSSR.

Dva tydni tamu ŭ jaho zdaryŭsia infarkt.

Apošnija dni jon pravioŭ u ciažkim stanie i pamior na rukach u žonki Ludviki, jakaja apiekavalisia im, niemačnym, doŭhija hady jahonaj słabaści.

Jon doŭha ciažka chvareŭ na dyjabiet, straciŭ zrok i nahu.

Aślepnuŭšy, vučyŭsia drukavać na kampjutary ŭślapuju, składajučy vieršy:

Krajina

Na pašparcie zołatam — VKL,
I viza ź minuŭščyny ŭ novi.
Čytajcie, zajzdroście — ja hramadzianin
Vialikaha Kniastva Lubovi.

Siaržuk naradziŭsia ŭ 1965 hodzie ŭ miastečku Čyść Maładziečanskaha r-na. Skončyŭ histfak BDU.

Šmat pisaŭ na temy maładziovaha ruchu, achovy pomnikaŭ, krajaznaŭstva. Z 1991 hoda žyŭ u Vilni, pracavaŭ u biełaruskaj škole, na radyjo i telebačańni. Straciŭšy zrok, nie spyniŭ aktyŭnaje dziejnaści, u pryvatnaści, arhanizoŭvaŭ «ślapyja ekskursii» dla biełarusaŭ pa staražytnaj stalicy VKŁ, praciahvaŭ šmat pisać, u tym liku dziciačyja kazki i p'jesy-batlejki.

U 2011 hodzie vyjšła jaho kniha «Dziń-dziliń: para hulać u kazki!». Radyjo «Racyja» zafundavała kampakt-dysk na jaje asnovie.

Jaho prezientacyja ŭ Minsku stała apošniaj imprezaj ź jahonym udziełam.

Paśla straty nahi jaho pieravieźli žyć u vilenskuju kvateru Siarhieja Dubaŭca, što na pieršym paviersie. Bo ź piataha pavierchu svajoj kvatery Vitušku ciažka było vazić na štodzionnyja pracedury ŭ špital.

Chavać Vitušku buduć u rodavaj vioscy Rahava.

3 lipienia maje adbycca raźvitańnie ŭ Vilni. 4 lipienia adbudziecca adpiavańnie ŭ hreka-katalickaj carkvie ŭ Minsku (Ardžanikidze, 6, st.m. «Aŭtazavodskaja») i raźvitańnie ź minskimi siabrami.

Da apošniaha Siarhiej nie traciŭ śvietlini duchu i humaru:

Epitafija

Ležučy pad kvitniejučaj hruškaj,
Razumieju — narešcie ja volny.
Tolki pčołki huduć mnie nad vuškam.
Usie davolny.

Adyšoŭ vałatoŭski čałaviek biełaruskaj nacyi.

Siarhiej Hiezhała

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH