Andrej Kraviec. Fota: Ukrainskaja praŭda
Andrej Kraviec, jak paviedamlajecca, sprabavaŭ viarnuć litoŭski DNŽ praz sud, ale pośpiechu nie mieŭ, i ciapier byłoha ŭkrainskaha čynoŭnika ź Litvy vysyłajuć.
U 2010 hodzie, kali Viktar Janukovič atrymaŭ pieramohu na prezidenckich vybarach va Ukrainie, Andrej Kraviec staŭ kiraŭnikom Dziaržaŭnaha kiravańnia spravami, jaho nazyvali «zahadčykam haspadarki Janukoviča». Viadoma, što kali paśla Majdana Janukovič źbieh u Rasiju, to ludzi vyjavili ŭ jahonaj rezidencyi załatyja ŭnitazy, pryvatny zaapark i kalekcyju antykvarnych aŭtamabilaŭ.
Pavodle infarmacyi litoŭskaha Departamienta dziaržaŭnaj biaśpieki, «Kraviec z žonkaj Marynaj Piełych udzielničali ŭ prysvajeńni režymam Janukoviča minimum 35 młrd jeŭra ź biudžetu Ukrainy, zajmalisia finansami prezidenta, raskošaj jaho asabniaka».
U 2014 hodzie Kraviec ź siamjoj pakinuŭ Ukrainu i atrymaŭ dazvoł na žycharstva ŭ Litvie. Jon pravioŭ tut amal 10 hadoŭ, zasnavaŭšy ŭłasny biznes.
Litoŭskija śpiecsłužby źviarnuli na jaho ŭvahu ŭ pačatku 2023 hoda, praz hod paśla ŭvarvańnia Rasii va Ukrainu.
«Pavodle acenki DDB, Kraviec i Piełych padtrymlivali suviazi z asiarodździem Janukoviča, pracavali na jaho prarasijski režym, tamu pavinny byli być łajalnyja ŭ dačynieńni da Rasii i jaje ahresiŭnaj źniešniaj palityki, jakaja ŭjaŭlaje pahrozu i nacyjanalnaj biaśpiecy Litvy. Rasijskija słužby mohuć vykarystoŭvać Kraŭca i Piełych u svaich metach jak łajalnych i nadziejnych asob», — skazana ŭ dakumiencie DDB ad 6 lutaha 2023 hoda.
Na padstavie hetaha dakumienta Departamient mihracyi 4 sakavika 2023 hoda pryniaŭ rašeńnie nie praciahvać dziejańnie dazvołu na žycharstva Kraŭca i členaŭ jaho siamji. Kraviec abskardziŭ hetaje rašeńnie ŭ sudach usich mahčymych instancyj, ale kančatkovuju kropku ŭ jahonaj spravie pastaviŭ hałoŭny administracyjny sud Litvy na minułym tydni.
Kraviec zapeŭnivaŭ, što acenka DDB pabudavanaja tolki na zdahadkach, nasamreč jon padtrymlivaje Ukrainu. Jon śćviardžaŭ, što ŭsie jahonyja kantakty ź Janukovičam byli tolki pracoŭnymi, a paśla lutaha 2014 hoda ŭsie suviazi ź im pierapynilisia. Adnak sudy adchilili arhumienty Kraŭca jak nieabhruntavanyja.
Na dumku suda, toj fakt, što Andrej Kraviec z žonkaj zajmajucca pryvatnym biznesam i nie byli sudzimyja va Ukrainie, nie aznačaje, što ich suviazi ź Janukovičam i jaho asiarodździem pierapynilisia, i što jany nie ŭjaŭlajuć pahrozy dla nacyjanalnaj biaśpieki Litvy.
Čytajcie taksama:
Filip Kirkoraŭ padaŭ na Litvu ŭ sud pa pravach čałavieka. Jaki vynik?
«Chaču zrabić Paźniaka piersonaj non-hrata» — litoŭski aktyvist
Litva pryznała byłoha milicyjanta Macijeviča pahrozaj nacbiaśpiecy
