Punkt propusku «Pryvałka» za niekalki hadzin da zakryćcia. Fota: telehram-kanał «Puł 4 Riehion»
Horad pieraŭtvaryŭsia ŭ tupik
Ad uskrain Hrodna da Polščy ŭsiaho kala 8 kiłamietraŭ, a da Litvy — kala 23. Blizkaść adrazu da dvuch krain ES rabiła abłasny centr zručnym łahistyčnym vuzłom. Dla žycharoŭ Hrodna pajezdki na zakupy ŭ Biełastok i ŭ akvapark u Druskininkaj raniej byli abydzienaj spravaj.
Mnohija haradžanie mieli mahčymaść nie tolki padarožničać i rabić zakupy ŭ susiednich krainach, ale i zarablać na pryhraničnym biznesie, tamu zakryćcio apošniaha punktu propusku niepadalok Hrodna stała balučaj temaj.
«Samym papularnym punktam propusku ŭ haradžan zaŭždy byli «Bruzhi». Heta byŭ samy blizki šlach da Biełastoka, a taksama najbolš «zručny» pierachod dla kantrabandystaŭ i čaŭnakoŭ», — pryznajecca surazmoŭca.
Ź jaho słoŭ, u horadzie mnohija žyvuć nadziejaj, što Polšča chutka adkryje «Bruzhi».
Ilustracyjny zdymak. Fota: «Aŭtabiźnies»
«Praŭda, pieršyja padobnyja čutki pačali źjaŭlajecca daŭno, asabliva aktyŭna hetuju temu abmiarkoŭvali naprykancy minułaha hoda. Ciapier znoŭ pra heta havorać, nibyta paśla taho, jak Litva zakryje hranicy, Polšča naadvarot adkryje», — kaža surazmoŭca.
Paśla zakryćcia «Bierastavicy» samy karotki šlach u Polšču dla haradziencaŭ pralahaŭ praź Litvu i punkt propusku «Pryvałka». Heta 240 kiłamietraŭ zamiest 80, kali pracavali «Bruzhi». Ciapier ža adlehłaść da Biełastoka ŭzraście amal da 500 kiłamietraŭ.
«Pierachod miažy ŭžo daŭno pieraŭtvaryŭsia ŭ niejkaje piekła»
Nie ŭ zachapleńni ad zakryćcia punktaŭ propusku pablizu Hrodna nie tolki amatary šopinhu i kantrabandysty.
Kiroŭca-dalnabojščyk, jaki pracuje ŭ adnoj z transpartnych kampanij z bazaj u Biełastoku, kaža, što nie viedaje, jak ciapier budzie viartacca z kadencyi.
Ilustracyjny zdymak. Fota: «Naša Niva»
«Pierachod miažy ŭžo daŭno pieraŭtvaryŭsia ŭ niejkaje piekła. Bo časam, kab dabracca z Hrodna da Biełastoka, sychodzić pa 30 hadzin i bolej. Pierad Novym hodam na «Pryvałcy» prastajaŭ bolš za dvoje sutak», — zhadvaje surazmoŭca.
Mužčyna kaža, što pry pracaŭładkavańni admysłova addavaŭ pieravahu biełastockim kampanijam, choć u Varšavie i bolš addalenych ad biełaruskaj miažy haradach zarpłaty krychu vyšejšyja.
«U narmalnyja časy mianie z rečami na mašynie zavoziła i sustrakała žonka. Daroha tudy i nazad zvyčajna zajmała 4-6 hadzin. Ciapier pra takoje zastajecca tolki maryć i jeździć na maršrutcy. Paśla zakryćcia jašče dvuch punktaŭ propusku čerhi i sama adlehłaść pavialičycca jašče bolš.
Atrymlivajecca, što z 14 sutak adpačynku 2-3 budzie sychodzić na darohu. Pa kiłamietražy raniej tudy-nazad vychodziła kala 200 kiłamietraŭ, ciapier budzie kala tysiačy», — skardzicca dalnabojščyk.
U Druskininkajskim akvaparku pa vychodnych było šmat haradziencaŭ
Čaŭnok z Hrodna pryznajecca, što paśla zakryćcia «Bierastavicy» jon pieršy čas jeździŭ praz «Pryvałku», ale paśla zrazumieŭ, što lepiej jeździć u Polšču praz «Bieniakoni».
«Pryvałka» — chiba najhoršy punkt propusku, — skardzicca jon. — Litoŭcy tam pracujuć vielmi marudna, dy i našy na zvarotnym šlachu pracavać nie śpiašajucca. Vyvaročvajuć na vyvarat usie rečy. Pastajanna staić čarha na skanier.
Navat z ulikam lišniaha kiłamietražu praściej było jechać praz «Bieniakoni», tam navat kali čarha jość, to jana ruchajecca našmat chutčej, čym było na «Pryvałcy».
Haradzieniec razvažaje, što kali była b mahčymaść vybirać, jaki punkt propusku adkryć, to jon vybraŭ by «Bruzhi».
«Tam zaŭždy davoli chutka pracavali z abodvuch bakoŭ miažy. Adrazu za miažoj vioska «Kuźnica». Raniej možna było nikudy dalej i nie jechać, a vyrašyć usie pytańni adrazu tam. Da Sakułki kiłamietraŭ 25, dy i da Biełastoka ad Hrodna kala 80 km.
Ad «Pryvałki» z ekanamičnaha punktu hledžańnia plonu mienš. Praź jaje zvyčajna jeduć tyja, chto choča trapić u Druskininkaj. Tam fajny akvapark, jość łyžnaja trasa dy i ŭ cełym pryhožy kurortny horad. Asabliva pa vychodnych u akvaparku možna było sustreć šmat haradziencaŭ».
Ilustracyjny zdymak. Fota: «Naša Niva»
Mužčyna kaža, što ŭ letni pieryjad było davoli papularnym dajechać da miažy na aŭto, dastać rovar i adtul užo na rovary da Druskininkaja.
Surazmoŭca kaža, što zakryćcio miežaŭ niehatyŭna adbivajecca na ekanomicy horada.
«U Hrodnie vielmi šmat ludziej zarablali dziakujučy hranicam. Niechta tolki i rabiŭ, što «haniaŭ na Polšču» i z taho žyŭ, dla inšych heta była tolki padpracoŭka. Dziakujučy hranicam Hrodna i Brest zaŭždy byli bolš bahatymi haradami ŭ paraŭnańni z abłasnymi centrami na ŭschodzie krainy. Ciapier ža my takoj mahčymaści faktyčna pazbaŭleny».
Hruzapieravozčyki narakajuć, što praź pieraŭtvareńnie Hrodna ŭ tupik dastaŭka tavaraŭ u horad, jakija staić la miežaŭ ź ES, budzie abychodzicca daražej, čym u Minsk.
Taksama praz zakrytyja miežy Hrodna moža całkam pazbavicca turystaŭ ź ES, jakich apošnim časam i tak było nie šmat u paraŭnańni z dakavidnymi časami, kali ŭ horadzie było šmat turystyčnych hrup ź Litvy i Polščy. Ciapier asnoŭnyja turysty ŭ horadzie — biełarusy i rasijanie.
Čytajcie taksama:
Za čatyry pajezdki ŭ Polšču moža atrymacca narmalnaja biełaruskaja zarpłata. Kolki zarablajuć biełaruskija čaŭnaki
Da čaho moža pryvieści zakryćcio jašče dvuch punktaŭ propusku na miažy ź Litvoj
