Skrynšot: Hulu / YouTube
Kultavy multyplikacyjny sieryjał i šmatrazovy pieramožca premii «Emi» viartajecca da prychilnikaŭ paśla 10-hadovaha čakańnia. «Futurama» debiutavała ŭ 1999 hodzie i adrazu ž zavajavała luboŭ hledačoŭ dziakujučy firmovamu humaru i satyry na sučasnaje hramadstva, a taksama praz parodyju na žanr navukovaja fantastyka. Šou było stvorana jak navukova-fantastyčny satyryčny multsieryjał dla darosłych Mettam Hrejninham i Devidam Koenam, aŭtarami «Simpsanaŭ» — samaha praciahłaha i adnaho z samych papularnych šou na amierykanskim telebačańni. Paśla apošniaha siezona «Futuramy» ŭ 2013 hodzie i amal dziesiacihadovaha pierapynku źjaviłasia navina, što stryminhavy servis Hulu zamoviŭ 20 novych epizodaŭ sieryjała. Pieršyja dziesiać epizodaŭ užo startavali 24 lipienia — i vyhladaje, što fanaty nie zasmučanyja.
Tym nie mienš vam nieabaviazkova być sapraŭdnym prychilnikam «Futuramy», kab acanić novy siezon. Biezumoŭna, budzie šmat «vielikodnych jajek» dla daŭnich prychilnikaŭ, i niekatoryja žarty byli b bolš zrazumiełymi, kali vy choć krychu znajomyja ź sieryjałam, ale novyja siužetnyja pavaroty zroblenyja tak, kab i novyja hledačy zmahli biez prablem sačyć za padziejami. Viadoma, šmat što źmianiłasia ŭ našym śviecie z 2013 hoda, a «Futurama» — sieryjał, u jakim zaŭsiody lubiać kamientavać biahučyja padziei, niahledziačy na toje, što dziejańnie adbyvajecca ŭ XXXI stahodździ. Tamu šmat hehaŭ budzie krucicca vakoł źjaŭ i padziej, aktualnych siońnia.
Skrynšot: Hulu / YouTube
Taksama ŭ sieryjale jość miesca i samaironii, jakaja supravadžaje doŭhačakanaje viartańnie «Futuramy», kali robat Bender (Džon Dy Madžya) pytaje: «Čamu majo piva niaśviežaje?»; ci kali jamajski biurakrat Hiermies (Fił Łamar) paśla pierazahruzki Suśvietu (i sieryjała) kaža, što adčuvaje siabie pierazahružanym.
U samym pieršym epizodzie «Niemahčymy patok» jašče da pačatkovych citraŭ prafiesar Farnsvart (Bili Uest) tłumačyć pieramiaščeńnie kamandy hierojaŭ z 3000 hoda ŭ 3023 «vializnym zbojem u płyni času» (samo saboj). Nahadajem, što ŭsio pačałosia z taho, što ŭ dalokim 1999-m hodzie adzin z hałoŭnych hierojaŭ Fraj (taksama Bili Uest, jaki ahučyŭ u sieryjale šmat piersanažaŭ) pavinien byŭ dastavić zamoŭniku picu. Vypadkova chłopiec byŭ zamarožany ŭ kryjahiennaj kamiery i adrodžany ŭ 3000-m hodzie.
Vydańnie Gizmodo piša ŭ svajoj recenzii, što, chacia časam zdajecca, što šou niasiecca napierad, sprabujučy ŭpichnuć pabolš ulubionych fanatami piersanažaŭ (Robat Djabał, Kalkułon, Robat Santa-Kłaus i, kaniečnie, Hipnažaba), usie staryja hieroi ŭplecienyja ŭ siužet davoli dalikatna, što robić «Futuramu» tym šou, jakim jana zaŭsiody była: ź dziŭnymi admietnaściami, razumnymi žartami i piersanažami, jakich nielha nie lubić, navat kali jany (čaściej za ŭsio) robiać nie toje. Pierachod da 2023 hoda zdajecca nastolki lohkim, nakolki možna sabie ŭjavić, što vyhladaje najlepšym sposabam nie tolki paradavać byłych prychilnikaŭ, ale i pryvabić novych.
Čytajcie taksama:
Brytanskaja palicyja złaviła 21 złačyncu mietadam z multfilma «Simpsany»
