Ministerstva justycyi admoviła ŭ rehistracyi Biełaruskaj partyi pracoŭnych (BPP), havorycca ŭ paviedamleńni, raźmieščanym 20 kastryčnika na sajcie ministerstva.
Jak adznačajecca ŭ paviedamleńni, Minjust vyvučyŭ dakumienty ab dziaržaŭnaj rehistracyi BPP na ich adpaviednaść dziejučamu zakanadaŭstvu, a taksama na pradmiet vykanańnia paradku stvareńnia palityčnaj partyi.
U chodzie vyvučeńnia śpisu zasnavalnikaŭ BPP i inšych dakumientaŭ, jakija tyčacca stvareńnia hetaj partyi,
Miniust ustanaviŭ, što «faktyčnaja kolkaść zasnavalnikaŭ mienšaja za minimalna dapuščalnuju kolkaść, nieabchodnuju dla stvareńnia palityčnaj partyi».
Dla pravierki dakładnaści pradstaŭlenych materyjałaŭ ministerstva zapytała ŭ Savieta BPP pratakoł arhkamiteta pa sklikańni ŭstanoŭčaha źjezda i inšyja dakumienty, jakija niepasredna tyčacca sklikańnia i praviadzieńnia ŭstanoŭčaha źjezda. Adnak, havorycca ŭ paviedamleńni, Saviet BPP adkazaŭ admovaj i matyvavaŭ heta tym, što paradak vyłučeńnia delehataŭ na źjezd pravierany mandatnaj kamisijaj. U suviazi z hetym było pryniata rašeńnie ab adterminoŭcy dziaržaŭnaj rehistracyi BPP i dadzieny dadatkovy termin dla vykanańnia patrabavańniaŭ.
Nazvanyja ŭ rašeńni ab adterminoŭcy rehistracyi patrabavańni vykanany nie byli, adznačajuć u Minjuście.
Ministerstvam ustanoŭlena, što śpis zasnavalnikaŭ BPP utrymlivaje źviestki, jakija nie adpaviadajuć rečaisnaści, vyjaŭleny taksama «šmatlikija parušeńni pry vyłučeńni delehataŭ na ŭstanoŭčy źjezd». «Tak, mnohija z nazvanych u śpisie zasnavalnikaŭ BPP asob u schodach pa vyłučeńni delehataŭ na ŭstanoŭčy źjezd, jak i ŭ pracy samoha źjezda, udziełu nie brali, ab časie i miescy praviadzieńnia hetych schodaŭ im nie paviedamlałasia, u suviazi z čym nazvanyja asoby nie mohuć być pryznanyja zasnavalnikami BPP. Heta taksama śviedčyć ab tym, što mandatnaj kamisijaj, jakaja pracavała na źjeździe, paŭnamoctvy delehataŭ źjezda naležnym čynam nie praviaralisia», — havorycca ŭ paviedamleńni.
Ustanoŭčy źjezd Biełaruskaj partyi pracoŭnych prajšoŭ 26 lipienia 2009 hoda ŭ Minsku, udzieł u im uziali 65 delehataŭ z usich abłaściej Biełarusi. Arhkamitet pa stvareńni BPP uznačalvaje Alaksandr Buchvostaŭ. Partyja stvarajecca na asnovie likvidavanaj u 2004 hodzie Biełaruskaj partyi pracy.
Biełaruskaja partyja pracy była stvorana ŭ 1993 hodzie. Da momantu likvidacyi jaje ŭznačalvaŭ, za vyklučeńniem niekalkich hadoŭ, Buchvostaŭ. Partyja była likvidavana 3 žniŭnia 2004 hoda na padstavie rašeńnia Viarchoŭnaha suda, jaki zadavoliŭ isk Ministerstva justycyi. Minjust abvinavaciŭ partyju ŭ sistematyčnym parušeńni Hramadzianskaha kodeksa, zakona ab palityčnych partyjach i ŭłasnaha statuta. Buchvostaŭ ličyć, što partyja była likvidavana «pavodle palityčnaj zamovy ŭładaŭ».
