Džona Makafi znajšli miortvym praź niekalki hadzin paśla taho, jak ispanski sud vyrašyŭ vydać jaho ZŠA, dzie jamu pahražaŭ vializny termin za ŭchileńnie ad vypłaty padatkaŭ. Pa słovach advakata, biznesmien ździejśniŭ samahubstva, piša The Wall Street Journal.
Makafi śćviardžaŭ, što suprać jaho isnuje zamova, a amierykanskija ŭłady pieraśledujuć jaho pa palityčnych matyvach. Adnak sud nie zmoh heta paćvierdzić, tamu było pryniata rašeńnie ab ekstradycyi.
Džon Makafi zasnavaŭ kampaniju, jakaja raspracavała adnu ź pieršych antyvirusnych prahram u 1987 hodzie. Kampanija stała adnoj z najbujniejšych u śviecie vytvorcaŭ antyvirusnaha prahramnaha zabieśpiačeńnia. U apošnija hady Makafi zajmaŭsia kryptavalutami, na čym zarabiŭ miljony, adnak, jak śćviardžajuć u prakuratury ŭ ZŠA, padatki z hetaha dachodu biznesmien nie vypłaciŭ.
U ZŠA Makafi abvinavacili ŭ tym, što z 2014 da 2018 hoda jon nie padavaŭ padatkavyja dekłaracyi i paźbiahaŭ vypłaty padatkaŭ, nazyvajučy inšych ludziej uładalnikami jaho aktyvaŭ, nieruchomaści i navat jachty.
Zatym Džona Makafi abvinavacili ŭ machlarstvie na kryptavalutach. Pa źviestkach prakuratury, Makafi padmanlivym šlacham prasoŭvaŭ kryptavaluty praz svoj akaŭnt u tvitary i razam z partniorami zarabiŭ na hetym bolš za dva miljony dalaraŭ.
Džona Makafi zatrymali letaś u kastryčniku ŭ aeraporcie Barsiełony pa zapycie ministerstva justycyi ZŠA. Pa viersii prakuratury, Makafi nie zapłaciŭ padatak u pamiery 23 miljonaŭ dalaraŭ za niekalki hadoŭ. U ZŠA biznesmienu za heta pahražała da 30 hadoŭ aryštu, a za machlarstva na kryptavalutach pažyćciovy termin.
