Fota heraldscotland.com.
22 červienia šatłandskaja futbolnaja kamanda dałučyłasia da šerahu inšych kamand, jakija pajechali dachaty paśla hrupavoha etapu čempijanatu Jeŭropy. Ale ž hetym hulcam naŭrad ci soramna za svaje vyniki: jany adpaviadajuć ciapierašniamu stanovišču šatłandskaha futboła. Kamanda, aproč inšaha, zdoleła vyrvać na turniry ničyju ŭ svaich zaklatych supiernikaŭ anhličan.
U apošniaj hulni na turniry, sa słavutaj charvackaj zbornaj, šatłandcy zabili svoj pieršy i adziny hoł na hetym Jeŭra. Tak vyjšła, što jany čakali hetaha miača 25 hadoŭ — z 1996 hoda, kali šatłandskaja zbornaja apošni raz vystupała na čempijanacie Jeŭropy. Paźniejšyja sproby trapić na turnir byli biespaśpiachovyja: zbornaja ŭ samy apošni momant prajhravała baraćbu za miesca na Jeŭra.
Tamu ŭčarašni hoł tym bolš kaštoŭny.
Usie hały hulni pamiž Šatłandyjaj i Charvatyjaj. Hoł Makhrehara na 5.17.
Jaho aŭtaram staŭ Kałum Makhrehar, paŭabaronca, jaki hulaje za kłub «Selcik» z Hłazha. Sam Makhrehar taksama rodam z Hłazha, najvialikšaha šatłandskaha horada, dzie isnuje dźvie vialikija kamandy — «Rejndžers» i toj samy «Selcik». Cikava, što supiernictva dvuch kłubaŭ, pa niekatorych danych, maje bolš za 130 hadoŭ historyi, adpaviedna, i adnosiny pamiž fanatami kłubaŭ vielmi składanyja. U dni matčaŭ kłubaŭ palicyja horada pierachodzić na ŭzmocnieny varyjant niasieńnia słužby, a sutyknieńni pamiž fanatami časam zakančvajucca latalnymi vynikami.
Tak ci inakš, Makhrehar jašče ŭ dziacinstvie vybraŭ dla siabie «Selcik» i dahetul zastajecca viernym hetamu kłubu. Jon i raniej zabivaŭ važnyja hały — naprykład, hoł u hulni suprać niamieckaj «Bavaryi» ŭ Lizie čempijonaŭ u kastryčniku 2017 hoda abo pieramožny hoł u matčy Lihi Jeŭropy suprać rasijskaha «Zienita» ŭ lutym 2018 hoda. Makhrehar hulaje za darosłuju zbornuju Šatłandyi z 2017-ha, razam z kłubam jon šeść razoŭ vyjhravaŭ čempijanat krainy i zaraz ličycca adnym z najvažniejšych hulcoŭ «Selcika».
Adnak i ŭ hetaj zorki byli svaje drennyja časy. U 2016 hodzie Makhrehar byŭ pazbaŭleny na hod pravoŭ na vadžeńnie aŭtamabila paśla taho, jak jaho złavili za styrnom u stanie ałkaholnaha apjanieńnia. U Šatłandyi adzin z markieraŭ pieravyšeńnia ałkaholu dla kiroŭcaŭ — vyjaŭleńnie bolš čym 22 mikrahramaŭ ałkaholu na 100 mililitraŭ vydychanaha pavietra. U vypadku z Makhreharam hetaja ličba skłała 78 mikrahramaŭ, pry hetym za niejki čas da taho hulca ŭžo pazbaŭlali pravoŭ na čatyry miesiacy za pieravyšeńnie chutkaści.
Fota sportsmole.co.uk.
Kałum bajaŭsia, što historyja z vadžeńniem u stanie apjanieńnia, jakaja atrymała šmat uvahi ad brytanskich tabłoidaŭ, moža drenna paŭpłyvać na jaho karjeru ŭ «Selciku». Ale, jak jon kazaŭ u intervju, jon pasprabavaŭ skancentravacca na svajoj pracy i hulni ŭ futboł — i heta pryniesła karyść. Kałum uspryniaŭ skandał vakoł siabie jak pamyłku, jakaja šmat čamu jaho navučyła.
Zaraz Makhrehara, chutčej, ličać važnym hulcom jak dla «Selcika», tak i dla zbornaj. Adnakłubniki, treniery i fanaty pavažajuć Kałuma za vybitnyja hulniavyja jakaści i pra vypadak z vadžeńniem u stanie apjanieńnia ŭžo nichto i nie ŭspaminaje. Ale ŭ Šatłandyi ŭsio roŭna isnuje mierkavańnie, što Makhrehara jak hulca niedaaceńvajuć.
Napeŭna, paśla hoła ŭ varoty Charvatyi ŭsio źmienicca.
