Minimizavać znachodžańnie pad pramymi soniečnymi pramianiami, abaraniać cieła pravilnaj adzieńniem i admysłovymi kremami, a taksama padtrymlivać vodny bałans arhanizma. Ab hetych i inšych praviłach pavodzin u śpiakotu raspaviali ŭ MNS.
Pavodle sinoptykaŭ, u Minsku dniom 20 červienia čakajecca +30..+32°C. Haračaje nadvorje zachavajecca i ŭ paniadziełak. Vidavočnaja ŭ hetym vypadku, ale nie zaŭsiody vykanalnaja parada — jak maha mienš znachodzicca pad pramymi soniečnymi pramianiami. Ad ich važna abaraniać cieła, vykarystoŭvajučy zakrytuju vopratku z naturalnych tkanin, hałaŭnyja ŭbory, soncaachoŭnyja kremy.
Pitny režym
U śpiakotu rekamiendujuć užyvać bolš vadkaści, ale nie śpirtnoha, dziejańnie jakoha ŭ takoje nadvorje ŭzmacniajecca — arhanizm stanovicca bolš adčuvalnym da vysokaj tempieratury. Rajać pić chałodnuju vadu, zialony čaj, kvas.
Pajezdki na aŭtamabili
Praciahłyja lepš abmiežavać. Varta być maksimalna ŭvažlivymi na darozie: padčas śpiakoty mohuć paharšacca samaadčuvańnie, reakcyja i raśsiejvacca ŭvaha. Ratavalniki zaklikajuć nie pakidać dziaciej u sałonie aŭto navat nienadoŭha, kab paźbiehnuć nieprytomnaha stanu dziciaci. Hetaja rekamiendacyja raspaŭsiudžvajecca i na žyvioł.
Adpačynak la vady
Varta vybirać dazvolenyja dla hetaha miescy, u tym liku tyja, dzie dziažurać ratavalniki Asvoda. Dno vadajoma pavinna być čystym i niehłybokim, biez karčakoŭ, bahavińnia i hleju. Niališnie taksama ahledziecca: ci niama bitaha škła, vostrych kamianioŭ i inšych niebiaśpiečnych pradmietaŭ. Važna nie vypuskać z-pad uvahi dziaciej, jakija hulajuć na bierazie.
Adkryty ahoń i šašłyki
Razvodzić vohniščy i smažyć šašłyki ŭ prystasavańniach dla pryhatavańnia ježy (manhał, hryl, tandyr) možna ŭ śpiecyjalna adviedzienych dla hetaha miescach, vyznačanych miascovymi orhanami ŭłady.
U vypadku dačy abo pryvatnaha doma pierš za ŭsio treba pierakanacca, što miesca dla ŭstanoŭki manhała i vohnišča biaśpiečnaje, vyklučaje traplańnie iskraŭ i połymia na haručyja elemienty budynkaŭ, zbudavańniaŭ. Pobač nie pavinna być suchich halinak i ŭsiaho, što zdolna lohka zaharecca.
Manhał abo vohnišča nielha pakidać biez nahladu abo na apieku dziaciej. Reštki padpalenych materyjałaŭ treba patušyć da poŭnaha spynieńnia tleńnia.
Hatavać šašłyki na bałkonie kateharyčna zabaroniena. Vyklučeńnie składajuć tolki prybory, jakija pa instrukcyi dapuščalna vykarystoŭvać u pamiaškańniach.
Varta pamiatać i ab tym, što ŭ niekatorych rajonach Biełarusi zabaroniena abo abmiežavana naviedvańnie lasoŭ. Adpaviednaja interaktyŭnaja karta jość na sajcie Minlashasa.
