Pa słovach ministra, MZS Biełarusi pradastaviŭ Rasii infarmacyju pra zatrymanych u Minsku rasijskich hramadzianach, u tym liku ab Safii Sapiehi.
«Uładzimir Uładzimiravič Makiej prainfarmavaŭ ab situacyi z zatrymanymi ŭ Biełarusi rasijskimi hramadzianami, maju na ŭvazie Safiju Sapiehu, Jahora Dudnikava. Pasolstva Rasii ŭ Minsku trymaje hetaje pytańnie na asablivym kantroli», — skazaŭ jon.
RF spadziajecca, što situacyja budzie ŭ chutkim časie vyrašanaja, zajaviŭ ministr.
«Budziem spadziavacca, što hetaja situacyja [z zatrymanymi rasijanami] budzie ŭ chutkim časie vyrašana», — skazaŭ jon.
Łaŭroŭ zaznačyŭ, što Maskva i Minsk zaniepakojenyja linijaj, jakuju pravodzić ES u dačynieńni da Rasii i Biełarusi.
Pavodle jaho słoŭ, linija ES nie moža być pryznana kanstruktyŭnaj, «kali farmulujucca ŭstanoŭki typu «adpor, strymlivańnie i ŭzajemadziejańnie». Heta troški nahadvaje rassłajeńnie dumki i naŭrad ci moža ličycca razumnaj palitykaj», — dadaŭ kiraŭnik MZS RF.
Taksama Łaŭroŭ i Makiej padkreślili pa vynikach pieramovaŭ, što naceleny na vykanańnie ŭsich zadač, pastaŭlenych Uładzimiram Pucinym i Alaksandram Łukašenkam.
«My praviali — učora i siońnia — vielmi padrabiaznyja pieramovy pa ŭsim kompleksie našych adnosin. Padkreślili, što naceleny na rašeńnie ŭsich tych zadač, jakija pastaŭleny prezidentami našych krain», — zaznačyŭ Łaŭroŭ.
Ministr nahadaŭ, što tolki sioleta Pucin i Łukašenka trojčy pravodzili vočnyja pieramovy. Dyjałoh Maskvy i Minska padtrymlivaŭsia i na ŭzroŭni kiraŭnikoŭ uradaŭ Rasii i Biełarusi Michaiła Mišuścina i Ramana Hałoŭčanki, a taksama pa linii roznych viedamstvaŭ. «Usio heta zabiaśpiečvała tradycyjna ščylnuju tkaninu našaha stratehičnaha partniorstva i sajuźnictva», — padkreśliŭ Łaŭroŭ.
Pavodle słoŭ Łaŭrova, na sustrečy byli vykładzieny acenki samitu, jaki adbyŭsia 16 červienia ŭ Ženievie pamiž prezidentami Rasii i ZŠA Uładzimiram Pucinym i Džo Bajdenam. «I siońnia ŭ nas užo ŭ pašyranym składzie budzie razmova pa cełym šerahu dadatkovych tem. Raźličvajem, što heta budzie praduktyŭna, jak zaŭsiody», — skazaŭ na zakančeńnie kiraŭnik MZS RF.
