Fota flickr.com
Razam ź inšymi bielhijcami na pole 12 červienia vyjšaŭ 28-hadovy napadajučy Ramiełu Łukaku, dy nie prosta vyjšaŭ — na 10-j chvilinie raśpiačataŭ sa svaim hałom varoty rasijskaj zbornaj, i na 88-j zabiŭ jašče raz. Cikava, što paśla pieršaha zabitaha hoła napadajučy padbieh da kamier i pieradaŭ pryvitańnie paŭabaroncu dackaj zbornaj Kryścijanu Eryksanu, ź jakim razam hulaje ŭ «Intery». Toj praz prablemy z sercam straciŭ prytomnaść prosta padčas hulni pamiž kamandami Danii i Finlandyi za niekalki hadzin da matču Bielhii i Rasii.
Dla Łukaku heta čaćviorty vialiki turnir u składzie nacyjanalnaj kamandy. Na minułym vialikim turniry — čempijanacie śvietu 2018 hoda ŭ Rasii — Ramełu atrymaŭ bronzavuju ŭznaharodu. Niadrennaja karjera dla chłopca, što ros u halečy.
Łukaku rodam ź bielhijskaha Antvierpiena. Jaho baćka taksama byŭ futbalistam i hulaŭ za roznyja bielhijskija kamandy, ale skončyŭ prafiesijnuju karjeru ŭ 1999 hodzie, kali Ramełu byŭ zusim maleńki. Maci chłopca pracavała prybiralščycaj.
Siamja budučaha forvarda bielhijskaj zbornaj i italjanskaha «Intera» žyła vielmi biedna. Častku hrošaj ź siamiejnaha biudžetu baćki Ramełu i jaho brata Žardana (darečy, taksama prafiesijnaha futbalista) vysyłali svajakam u Konha. Ale sapraŭdnaja biednaść pryjšła ŭ siamju, kali baćka Ramełu skončyŭ z prafiesijnym futbołam.
U svaich uspaminach Łukaku raspaviadaje pra momant, kali zrazumieŭ, u jakoj halečy žyvie jaho siamja. Kali jamu było šeść hadoŭ, Ramełu pabačyŭ, jak jaho maci tajemna padlivaje vadu ŭ małako, jakoje razam z chlebam užo niejki čas było adzinym punktam u mieniu budučaha futbalista. Da hetaha siamji ŭžo pryjšłosia admovicca šmat ad čaho — spačatku ad kabielnaha telebačańnia i adpaviedna ad mahčymaści prahladać futbolnyja matčy, potym na praciahu tydniaŭ im davodziłasia žyć biez haračaj vady i elektryčnaści. Pa pakojach kvatery, dzie žyŭ maleńki Ramełu, biehali pacuki, i časam u siamji nie chapała hrošaj navat na chleb — dobra, što ŭ susiedniaj piakarni dazvalali raźličvacca za jaho paźniej.
Fota lifebogger.com
Jak śćviardžaje Łukaku, jašče tady, va ŭzroście šaści hadoŭ, jon pastaviŭ dla siabie metu ŭsio źmianić. U jakaści srodka, jaki pavinien byŭ vyratavać jaho siamju, Łukaku vybraŭ prafiesijny futboł i paabiacaŭ sabie, što ŭ 16 hadoŭ jon budzie hulać u adnym z najlepšych bielhijskich kłubaŭ — «Anderlechcie». Tak atrymałasia, što jon padpisaŭ kantrakt z hetym kłubam akurat u dzień svajho šasnaccacihodździa — 13 maja 2009 hoda, a praz adzinaccać dzion užo vyjšaŭ na pole ŭ svajoj pieršaj hulni za «Anderlecht».
Potym byli anhlijskija «Čełsi», «Uest Bromvič Albijon» i «Mančester Junajted». U žniŭni 2019 hoda Łukaku apynuŭsia ŭ italjanskim «Intery». Za jaho pierachod u kłub italjancy zapłacili 74 miljony funtaŭ sterlinhaŭ — samaja vialikaja suma za futbalista ŭ historyi «Intera».
Što tyčycca nacyjanalnaj zbornaj, Ramełu pačali vyklikać jašče ŭ jaje moładzievyja składy. U darosłaj nacyjanałcy jon z 2010 hoda, i, jak adznačajuć analityki, na ciapierašni čempijanat Jeŭropy Łukaku pryjechaŭ u cudoŭnaj formie.
Fota Wikimedia Commons
Ad futbalistaŭ časta čakajuć dzikunskich pavodzin, ale heta nie vypadak Łukaku. Hety hulec — viernik, i relihija zajmaje važnuju častku ŭ jaho žyćci, bielhijec rehularna molicca i čytaje Bibliju. Adna ź jaho cytat, jakaja zrabiłasia šyroka viadomaj, hučyć tak: «Žadaju być viadomym jak dobry futbalist, a nie jak Ramełu, jaki chodzić pa kłubach i palivaje ŭsio šampanskim». A vosieńniu 2019 hoda Łukaku patraciŭ 125 tysiač jeŭra, kab pieradać na dabračynnyja patreby 5 tysiač biletaŭ na hulniu z Kipram.
U intervju pierad pačatkam ciapierašniaha čempijanata Jeŭropy Ramełu śćviardžaŭ, što bielhijskaja zbornaja całkam hatovaja da turniru. Zhodna ź jaho słovami, kamanda stała lepiej abaraniacca i bolš rezultatyŭna dziejničać u atacy. Pahladzim, jak dla bielhijca skončycca hety čempijanat.
