Fota Nadziei Bužan
U ciapierašnich vahańniach kursaŭ niama ničoha nadzvyčajnaha, heta naturalny praces, zaŭvažaje ekanamist Dźmitryj Kruk. Pakolki naš źniešni handal pieravažna aryjentavany na Rasiju, to i trajektoryja biełaruskaha rubla častkova paŭtaraje trajektoryju rasijskaj valuty.
«U hetaj zakanamiernaści mohuć być adchileńni, ci navat jana naohuł moža na peŭny pieryjad pierastać pracavać — u vypadku, kali na pieršy płan vychodziać niejkija ŭnutranyja čyńniki. Naprykład, adbyvajecca šok u stanie biełaruskaha źniešniaha handlu ci na ŭnutranym rynku.
Ale mienavita ŭ hety momant takoha kštałtu šokaŭ niama.
U śviecie maje miesca trend peŭnaha abiasceńvańnia dalara da inšych valut (z pačatku hoda ŭ adpaviednaści z tak zvanym indeksam dalara jon abiasceniŭsia da košyku inšych klučavych suśvietnych valut prykładna na 10%). Apošnimi tydniami da hetaha trendu dadajecca jašče suśvietny rost cen na naftu.
U takich varunkach valuty krainaŭ-eksparcioraŭ nafty ŭmacoŭvajucca da dalara ŭ bolšaj stupieni, čym inšyja. Heta jakraz vypadak Rasii. Apošnimi tydniami rasijski rubiel umacavaŭsia da dalara da ŭzroŭniu hadavoha maksimumu», — kaža ekśpiert.
Pry hetym biełaruski rubiel raście da dalara mienšymi tempami za rasijski.
«Inšaja havorka, kali ŭ hulniu ŭstupiać unutranyja čyńniki. Naprykład, tyja zajavy pa sankcyjach, jakija zaraz anansujucca, u vypadku implemientacyi mohuć stać vielmi istotnym šokam dla stanu biełaruskaha źniešniaha handlu i finansavaha rynku», — dadaje Dźmitryj Kruk.
Padobnuju acenku situacyi daje i akademičny dyrektar daśledčaha centra Beroc Kaciaryna Barnukova.
«Pakul naš valutny rynak pavodzić siabie davoli blizaruka. Jon reahuje ŭ pieršuju čarhu na tyja padziei, jakija adbyvajucca prosta ciapier — rost cany na naftu i ŭmacavańnie rasijskaha rubla. Pry hetym rynak, zdajecca, absalutna nie bačyć budučych ryzyk (budučych sankcyj i ich upłyvu na valutnuju vyručku) i nie reahuje na ich. Uźnikaje pytańnie, a ci jość na rynku žyvyja ekanamičnyja ahienty ci jon užo zarehulavany da takoj stupieni, što vykonvaje čysta techničnyja funkcyi pieradačy valuty ad eksparcioraŭ imparcioram.
Dumaju, što amierykanskija sankcyi ŭžo ŭ bližejšyja tydni pačnuć adbivacca na valutnaj vyručcy, i takoje ŭmacavańnie biełaruskaha rubla naŭrad ci budzie mahčyma doŭha padtrymlivać. A kali realizujucca ryzyki novych sankcyj, miarkuju, da kanca červienia my možam ubačyć zusim inšuju karcinu, niahledziačy na ceny na naftu i rasijski rubiel», — ličyć Kaciaryna Barnukova.
