Makiet BREST-300
BREST-300 — heta rasijski prajekt unikalnaha enierhabłoka z reaktarnaj ustanoŭkaj na chutkich niejtronach (Bystryj RIEaktor so Śvincovym Tiepłonositielem). Reaktar pačała budavać dziaržkarparacyja «Rasatam» u zakrytym horadzie Sieviersk Tomskaj vobłaści, piša TASS.
Reaktary na chutkich niejtronach ličacca bolš efiektyŭnymi i biaśpiečnymi, čym reaktary na ciepłavych niejtronach.
Budaŭnictva reaktara ažyćciaŭlajecca ŭ miežach prajekta «Praryŭ», nakiravanaha na stvareńnie novaj technałahičnaj płatformy atamnaj haliny z zamknionym jadziernym paliŭnym cykłam.
BREST-300 — hałoŭny abjekt enierhietyčnaha kompleksu, jaki budzie stvorany na placoŭcy Rasatama «Sibirski chimičny kambinat». Akramia reaktara, tut jašče pabudujuć kompleks pa vytvorčaści jadziernaha paliva dla enierhabłoka, a taksama kompleks pa pierapracoŭcy vykarystanaha paliva. U vyniku pavinien atrymacca zamkniony jadzierny paliŭny cykł, jaki daść mahčymaść nie tolki vyrablać elektryčnaść, ale i rabić z adpracavanaha ŭ reaktary paliva novaje. Inakš kažučy, «Rasatam» płanuje stvaryć štości nakštałt biaskoncaj krynicy jadziernaha paliva, što moža vyrašyć prablemu jadziernych adkidaŭ.
Jašče adnoj asablivaściu prajekta źjaŭlajecca kancepcyja «naturalnaj biaśpieki». Pad hetym raspracoŭščyki reaktara majuć na ŭvazie jadziernuju i radyjacyjnuju biaśpieku za košt paśladoŭnaj admovy ad techničnych rašeńniaŭ, jakija patencyjna ŭjaŭlajuć saboj pahrozu avaryi. Heta značyć, što sam reaktar i jaho paliva musiać być nastolki biaśpiečnymi, što nie budzie nieabchodnaści ŭ vialikaj kolkaści techničnych srodkaŭ i sistem dla zabieśpiačeńnia biaśpieki, što ŭ budučyni moža zrabić budaŭnictva AES bolš tannym i prostym.
Zapusk reaktara ŭ ekspłuatacyju zapłanavany na 2027 hod.
