Paśla razvału SSSR i savieckaha błoka Polšča, krainy Bałtyi i Uschodniaj Jeŭropy ŭziali kurs na intehracyju ŭ Jeŭrapiejski sajuz, tady jak Biełaruś — na Rasiju.
Prajšło 30 hadoŭ, i vyniki vybaru palityčnaha i ekanamičnaha kursu možna acanić nie tolki pa ekanamičnych pakazčykach, pamiery zarobkaŭ, ale i pa ŭpłyvie na taki kansiervatyŭny indykatar, jak praciahłaść žyćcia.
Jak i ŭ 1989—1991 hadach, pa praciahłaści žyćcia Biełaruś apiaredžvaje Rasiju, Ukrainu i Małdovu, a voś ad krain Jeŭrapiejskaha sajuza my istotna adstali.
Na vychadzie z SSSR Biełaruś pa praciahłaści žyćcia značna, na 1-2 hady, apiaredžvała Estoniju, Rumyniju i Łatviju i była na adnym uzroŭni z Polščaj, Litvoj i Bałharyjaj. Ciapier jana adstaje ad usich ich, pryčym ad Polščy i Estonii — na 3-5 hadoŭ.
U 1989 hodzie, kali pačaŭsia raspad savieckaj sistemy, u Biełarusi siaredniaja praciahłaść žyćcia składała 71,5 hoda, u Rasii — 69,2 hoda, u Polščy — 71 hod, u Litvie — 71,4 hoda, u Łatvii — 70,2 hoda, u Estonii — 70 hadoŭ, u Rumynii — 69,5 hoda.
U 2019 hodzie, pavodle źviestak Suśvietnaha banku, praciahłaść žyćcia ŭ Biełarusi skłała 74,2 hoda, u Rasii — 73,1 hoda, u Polščy — 77,9 hoda, u Litvie — 76,1 hoda, u Łatvii — 75,2 hoda, u Estonii — 78,5 hoda, u Rumynii — 75,5 hoda.
| 1989 | 1991 | 2019 | |
| Biełaruś | 71,5 | 70,4 | 74,2 |
| Rasija | 69,2 | 68,5 | 73,1 |
| Polšča | 71 | 70,6 | 77,9 |
| Litva | 71,4 | 70,1 | 76,1 |
| Łatvija | 70,2 | 69 | 75,2 |
| Estonija | 70 | 69,4 | 78,5 |
| Rumynija | 69,5 | 69,8 | 75,5 |
| Bałharyja | 71,7 | 71,6 | 74,9 |
Momant adryvu našych susiedziaŭ ad nas vyrazna bačny na supastaŭleńni hrafikaŭ. Ën zdaryŭsia ŭ druhoj pałovie 1990-ch i pačatku 2000-ch. Asabliva ŭražvaje pośpiech Estonii.
Praciahłaść žyćcia ŭ zachodniejeŭrapiejskich krainach ES usio jašče bolšaja, čym na ŭschodzie Jeŭropy, ale heta roźnica skaračajecca.
U 1989 hodzie siaredniaja praciahłaść žyćcia ŭ Partuhalii, najbiadniejšaj dziaržavie ES, składała 74,3 hoda, ciapier — 80,7 hoda. U Francyi, Italii, Ispanii, Šviecyi i na Malcie jana składaje siońnia 83 hady, u Niamieččynie — 82 hady.
Usie hetyja źviestki ŭziatyja sa statystyki Suśvietnaha banka.
Praciahłaść žyćcia zaležyć jak ad uzroŭniu dachodaŭ, tak i ad zvyčak ludziej, a taksama ad jakaści achovy zdaroŭja.
