Fota flickr.com.
Navukoŭcy znajšli sposab kantralavać čałaviečy mozh. Dla hetaha im spatrebiłasia rečyva z žyvioły, jakuju časam zavuć «rybaj-vampiram», i jakaja isnuje na našaj płaniecie sotni miljonaŭ hadoŭ.
Daśledčyki ź miedycynskaha fakulteta Vašynhtonskaha ŭniviersiteta i z Univiersiteta Vašynhtona ŭ Sent-Łuisie paśpiachova vykarystali białok z ryby-minohi dla taho, kab vyklučyć niejronnyja łancuhi. U białku pad nazvaj parapinopsin jany znajšli hien, jaki moža być aktyviravany ci dezaktyviravany z dapamohaj śviatła, raspaviadaje Daily Mail.
Vyśvietliłasia, što hien zdolny kantralavać uzajemadziejańnie pamiž niejronami. Mahčyma, dziakujučy hetaj infarmacyi možna budzie stvaryć mazhavyja impłanty, jakija dapamohuć pryhniatać aktyŭnaść šerahu niejronaŭ, i, takim čynam dazvolać lačyć tych, chto pakutuje na depresiju, zaležnaści i tryvožnaść.
Varta adznačyć, što, chacia parapinopsin znojdzieny mienavita ŭ składzie minohi, rodnasnyja jamu białki typu GPCR isnujuć u samych roznych arhanizmach — ad bakteryj da čałavieka.
Toje, što hety białok aktyvujecca z dapamohaj śviatła, moža pazbavić ludziej ad nieabchodnaści prymać štučnyja leki ad depresii, jakija mohuć mieć pabočnyja efiekty. Zamiest hetaha možna budzie prosta nakiroŭvać na niejrony biasškodny pramień śviatła.
Minoha isnuje na Ziamli ŭžo kala 360 miljonaŭ hadoŭ. Heta ryba-parazit, jakaja, kab atrymać charčavańnie, prymacoŭvajecca rotam da boku ryby abo kita, paśla čaho pačynaje smaktać u žyvioły kroŭ. Dziakujučy hetamu i tamu, što ŭ minohi vialiki rot, jana i atrymała mianušku «ryba-vampir».
