Fota Nadziei Bužan
«Ciapier, kali my pakinuli ES, u Vialikabrytanii źjavilisia novyja mahčymaści dla ŭzmacnieńnia standartaŭ achovy žyvioł i ŭmacavańnia svaich pazicyj jak hłabalnaha achoŭnika pravoŭ žyvioł», — śćviardžajecca na sajcie brytanskaha ŭrada.
Płanujecca, što na zakanadaŭčym uzroŭni žyvioły ŭ karaleŭstvie buduć pryznanymi razumnymi istotami.
Siarod inšych mier — abaviazkovaje mikračypavańnie chatnich katoŭ, paviedamlaje BBC. U Vialikabrytanii ŭžo prymianiajecca takaja palityka ŭ adnosinach da sabak, što vykonvajecca na 90%. Dziakujučy mikračypavańniu ŭładalnik moža ź lohkaściu znajści žyviołu, kali jana zhubicca, abaranić kata ci sabaku ad kradziažu, a taksama prytułki dla biazdomnych žyvioł zmohuć adsočvać ludziej, jakija naŭmysna pakidajuć svaich hadavancaŭ na vulicy.
Akramia hetaha, brytanski ŭrad uviadzie zabaronu na vykarystańnie elektrašokavych ašyjnikaŭ, spynić ekspart žyvioł na adkorm i zarez i zabaronić utrymańnie prymataŭ u jakaści chatnich žyvioł.
Taksama ŭrad budzie razhladać zabaronu fua-hra — dalikates francuzskaj kuchni ź piečani husi ci kački. Stvareńnie takoha dalikatesu, jak praviła, źviazanaje z žorstkim abychodžańniem z ptuškami: ich prymusova kormiać praz trubku ŭ horle, kab piečań ptušak pavialičyłasia.
Bolš za toje, u Vialikabrytanii mohuć uvieści zabaronu na prodaž słanovaj kostki, a taksama abmiarkoŭvajecca zabarona rekłamy ŭ karaleŭstvie, jakaja prapahanduje «nieprymalnyja mietady abychodžańnia z žyviołami», naprykład, katańnie na słanach.
Za apošnija dziesiać hadoŭ Vialikbrytanija pryniała šmat zakonaŭ ab abychodžańni z žyviołami. U pryvatnaści, ułady zabaranili vykarystoŭvać dzikich žyvioł u cyrku, vymusili ŭstalavać kamiery videanazirańnia na raźnicach i ŭzmacnili maksimalnaje pakarańnie za žorstkaje abychodžańnie z žyviołami z šaści miesiacaŭ da piaci hadoŭ pazbaŭleńnia voli.
