Tut.by
Na łavie padsudnych — 13 čałaviek, 11 ź jakich — palitźniavolenyja. Ź ich dvoje — niepaŭnaletnija.
Taksama ŭ hetaj partyi sudziać 18-hadovuju Vitaliju Bandarenku, jakuju źbiralisia sudzić raniej, ale na sud jana nie źjaviłasia tady, bo źjechała za miažu. Kali viarnułasia, kab pabačyć svajho kachanaha pierad kałonijaj (niepaŭnahadovaha Dzianisa Chazieja asudzili na 3 hady papraŭčaj kałonii), jaje zatrymali i źmiaścili ŭ SIZA №7.
12 maja prakuror prapanavaŭ pryznačyć nastupnyja pakarańni dla fihurantaŭ hetaj spravy:
- 18-hadovaja palitźniavolenaja Vitalija Bandarenka — 4 hady kałonii ahulnaha režymu;
- 26-hadovy były desantnik Dzianis Marusievič — 4 hady kałonii ŭzmocnienaha režymu;
- 22-hadovy Uładzimir Rubašeŭski — 4 hady kałonii ŭzmocnienaha režymu;
- 21-hadovy Mark Sałonikaŭ — 4,5 hady kałonii ŭzmocnienaha režymu;
- 27-hadovy Viktar Pancialejeŭ — 4 hady kałonii ŭzmocnienaha režymu;
- 20-hadovy Daniła Bandaruk — 5 hadoŭ kałonii ŭzmocnienaha režymu (pa č. 1 art. 339 i pa č. 2 art. 293);
- 32-hadovy Viačasłaŭ Kaściučyk — 4 hady kałonii ŭzmocnienaha režymu;
- 20-hadovy Maksim Zinievič — 4 hady kałonii ŭzmocnienaha režymu;
- 24-hadovy Michaił Kališuk — 4 hady kałonii ŭzmocnienaha režymu;
- niepaŭnaletni Alaksandr Viniarski — 3 hady vychavaŭčaj kałonii (prosiać uziać ich pad vartu ŭ zale suda);
- niepaŭnaletni Eduard Kudyniuk — 3 hady vychavaŭčaj kałonii (prosiać uziać ich pad vartu ŭ zale suda);
- 22-hadovy Andrej Hryščuk — 3,5 hady kałonii ŭzmocnienaha režymu;
- 23-hadovy Siman Kancevič — 3,5 hady kałonii ŭzmocnienaha režymu.
Pavodle viersii śledstva, padčas akcyi pratestu ŭ centry Bresta abvinavačanyja hruba parušyli hramadski paradak, učynili pahromy, nanieśli supracoŭnikam milicyi ŭdary rukami i nahami, roznymi pradmietami. U chod išli doški, pałki, vuličnyja skryni dla śmiećcia, frahmienty łavak, tratuarnaj plitki i asfaltu, butelki, kamiani, mietaličnyja bałty, jomistaści z farbaj, piratechničnyja vyraby.
U vyniku biesparadkaŭ, pa viersii śledstva, paciarpieli 24 siłavika. Ź ich paciarpiełymi pa spravie pryznanyja 19 čałaviek. Adzin supracoŭnik atrymaŭ dźvie rany ŭ vobłaści vialikaha palca pravaj piaści, jakija adnosiacca da katehoryi lohkich cialesnych paškodžańniaŭ. U astatnich — paboi. Akramia taho, abvinavačanyja sprabavali ŭžyć hvałt i pryčynić cialesnyja paškodžańni jašče traim siłavikam, zajaviŭ u sudzie dziaržabvinavaŭca.
Usiaho ž pa spravie ahulnaja suma naniesienaj, pa viersii śledstva, škody — kala 24 tysiač rubloŭ: paškodžanyja 13 aŭtamabilaŭ milicyi, adzin aŭtobus, ščyty, šlemy, broniekamizelki, asfalt, tratuarnaja plitka, łaŭki, urny, drevy.
Usie paciarpiełyja admovilisia ad pazovaŭ ab kampiensacyi maralnaj abo majomasnaj škody da abvinavačanych.
Usie abvinavačvajucca pa č. 2 art. 293 Kryminalnaha kodeksa. 20-hadovy Daniła Bandaruk jašče abvinavačvajecca ŭ chulihanstvie: pa viersii prakuratury, 9 žniŭnia jon udaryŭ rukoj pa hruzavym aŭtamabili MAZ i raźbiŭ bakavoje lusterka.
Taksama dziaržabvinavačańnie prosić spahnać z 13 abvinavačanych u roŭnych dolach kampiensacyju:
- 13621,50 rubloŭ — na karyść UUS Brestabłvykankama;
- 457,98 rubloŭ — Departamientu achovy MUS;
- 2781,16 rubloŭ — KUP Bresckaje DEP;
- 5307,50 rubloŭ — KUP «Kamunalnik»;
- 689,79 rubloŭ — KUP «Brescki hramadski transpart»;
- paciarpiełamu Łyčko pakryć pryčynieńnie maralnaj škody.
Troje padsudnych całkam pahadzilisia z pradjaŭlenym abvinavačvańniem, siamiora — častkova. Vitalija Bandarenka, Daniła Bandaruk i Mark Sałonikaŭ vinu nie pryznali.
