Zaduma ŭkrainskich biznesmienaŭ była ŭ tym, kab zapłacić «Naftanu» bolš hrošaj napierad, jašče pierad pačatkam dziejańnia sankcyj, a potym vyvozić bitum pavodle raniejšych damovaŭ. Adnak upiorlisia ŭkrainskija banki, jakija nie chočuć rabić tranzakcyi na rachunki biełaruskaha pradpryjemstva, bajučysia taksama trapić pad abmiežavańni.
«Ciapier viadziecca, faktyčna, pošuk banka, jaki nie pabaicca pieravodzić hrošy. Ale pakul jon biezvynikovy, bo nichto nie choča ryzykavać», — tłumačać udzielniki rynku.
Niezrazumieła, ci možna budzie pastaŭlać bitum z Navapołacka pad vyhladam pradukcyi z Mazyra, tamu što ŭ takoj schiemie majuć być zadziejničany mnohija struktury — ad łabaratoryj da mytni. A kali takaja schiema vykryjecca, nastupstvy mohuć być niepradkazalnyja dla ŭsich jaje ŭdzielnikaŭ.
Čytajcie: Spynieńnie pastavak nafty z Rasii stavić pad udar usiu ekanamičnuju madel Biełarusi. Što adbyvajecca na «Naftanie»?
Amierykanskija sankcyi suprać «Naftana» pahražajuć sarvać płany biełarusaŭ zarabić letam na vialikim i premijalnym ukrainskim rynku: jašče niadaŭna Ukraina rychtavałasia da vajny, zamaroziŭšy infrastrukturnyja prajekty, ale ciapier jany razmarožanyja.
Nastupaje vysoki siezon dla budoŭli daroh i nieruchomaści, patreby ŭ bitumie vielizarnyja.
Z ulikam taho, što pastaŭki naftapraduktaŭ z Rasii va Ukrainu zabaronienyja, usie viarški ŭ apošnija hady zdymali biełaruskija kampanii, jak praviła, prydziaržaŭnyja. U najlepšyja časy Biełaruś pradavała bitum va Ukrainu za 460 dalaraŭ za tonu, u toj čas jak u Rasii jon kaštavaŭ 220 dalaraŭ za tonu. Letaś Biełaruś pradała va Ukrainu 583 tysiačy ton bitumu, ź ich 410 tysiač ton było pastaŭlena z Mazyrskaha NPZ, 173 tysiač ton — z Navapołacka.
Va ŭmovach faktyčnaha spynieńnia pastavak rasijskaj nafty ŭ Navapołack bačycca małaimaviernym zadavalnieńnie adnym zavodam usiaho ŭkrainskaha popytu. Rynak, dzie daminavali biełarusy, ryzykuje być pieradzielenym pamiž jeŭrapiejskimi hulcami z bolš darahoj pradukcyjaj.
