Janina taksama paviedamiła, što atrymała papiery, u jakich havorycca pra nakładańnie aryštu na dom u Babry, u jakim žyvie siamja Puškina i jaki naležyć Puškinu. Aryšt robicca na padstavie pastanovy śledčaha Ŭpraŭleńnia ŭnutranych spraŭ pa Haradzienskaj vobłaści.
Heta ŭžo 16-ty sud Puškina pa administracyjnych spravach za ŭvieś čas.
Taksama Alesiu Puškinu dvojčy aficyjna i nastojliva prapanavali samomu napisać zajavu ab zvalnieńni ź «Biełrestaŭracyi».
«Ja admaŭlajusia, niachaj zvalniajuć sami pa jakoj zaŭhodna pryčynie. Pakul na 23 krasavika ja jašče rabotnik, mastak-restaŭratar «Biełrestaŭracyi»», — piša Aleś.
Aleś Puškin piša, kab Janina pryjaždžała tolki na pieršy dzień sudu i bolš nia jeździła.
«Sud budzie doŭhim i nudnym. Pieradačy nie pieradavajcie, bo hłupstva žulikaŭ karmić, što sa mnoju siadziać, — piša Aleś Puškin. — Usio treba dzieciam, bo ciažka budzie i za Marylku płacić štomiesiac u licei, i Mikołka pastupić, vučyć jaho».
Taksama Aleś piša, što ŭ kancy śledztva addaduć zabranyja rečy: kamputar, telefony Janiny i syna Mikoły.
«Pavodle śledčaha, sud budzie miesiacaŭ praź piać, — kaža Janina. — Kali hetuju spravu pryčapili da «polskaj spravy», to heta ž treba «izaščrycca», kab usio heta źviazać».
U minułuju piatnicu da Alesia Puškina ŭ mienskaje SIZA ŭpieršyniu puścili advakata.
«Jana skazała, što Alesiu ŭ Miensku spadabałasia navat bolš, čym u Horadni. Kaža, nie chvalujciesia».
Aleś Puškin taksama dasłaŭ asobnyja listy dzieciam.
«Pryjšli čatyry listy, adzin dačce, druhi synu, treci mnie i adzin ahulny. Taksama ŭ listach Aleś daje «CU»: dvor kasić, tualet prybirać, drovy rychtavać», — kaža Janina.
Janina ŭdziačnaja za salidarnaść, jakuju vykazvajuć siamji.
«Siabry, valantery adhukajucca, usie prajaŭlajuć salidarnaść i mnie dapamahajuć, zrabili dastaŭku charčoŭ. Telefanujuć navat nieznajomyja ludzi i pytajucca, čym dapamahčy», — kaža Janina Puškina.
Puškin pahaliŭsia
Palitviaźnia Alesia Puškina ŭtrymlivajuć u mienskim SIZA № 1 na Vaładarskaha.
Aktyvist z Homla Illa Mironaŭ napisaŭ u fejsbuku, što atrymaŭ ad Alesia Puškina malunak z aŭtapartretam. List byŭ napisany mastakom jašče ŭ haradzienskim SIZA. Pavodle Alesia Puškina, kali ŭ jaho źjavilisia vošy, to «daviałosia pryniać radykalnyja miery». Z malunka vidać, što mastak pahaliŭ hałavu.
«Ciapier ja ŭ specoŭcy «Biełrestaŭracyja», jakuju mnie paśpieli ŭkinuć u milicejskuju mašynu pry aryšcie 30 sakavika ŭ vioscy Žyličy, u pałacy Bułhaka, dzie ja pracavaŭ», — piša Puškin.
U čym vinavaciać Alesia Puškina
30 sakavika mastaka zatrymali ŭ vioscy Žyličy Kiraŭskaha rajonu, dzie jon pracavaŭ na restaŭracyi pałaca Bułhakaŭ. Ciapier jaho ŭtrymlivajuć u haradzienskim izalatary, jon fihurant kryminalnaj spravy, jakuju pačała haradzienskaja prakuratura pavodle č. 3 art.130 Kryminalnaha kodeksu (raspalvańnie varožaści). Pavodle prakuratury, «za ŭčynieńnie naŭmysnych dziejańniaŭ, nakiravanych na reabilitacyju i apraŭdańnie nacyzmu».
Padstavaj dla hetaha staŭ partret antysavieckaha padpolščyka Jaŭhiena Žychara «z aŭtamatam na plačy», jaki byŭ vystaŭleny ŭ pryvatnym «Centry haradzkoha žyćcia» ŭ Horadni. Spačatku Alesia Puškina źmiaścili ŭ haradzienski SIZA, a potym pieraviali ŭ Miensk.
