Pavodle infarmacyi niamieckaha ahienctva dpa, čatyry niamieckija advakaty źviarnulisia ŭ Fiederalnuju prakuraturu ŭ Karłsrue ŭ suviazi z užyvańniem hvałtu ŭ dačynieńni da mirnych žycharoŭ Biełarusi na fonie mirnych pratestaŭ, jakija pačalisia paśla prezidenckich vybaraŭ u žniŭni 2020 hoda.
Ad imia paciarpiełych ad katavańniaŭ biełarusaŭ jany zajavili ŭ prakuraturu ab złačynstvach suprać čałaviečnaści.
Advakaty padkreślili, što ŭ Biełarusi ni Łukašenku, ni supracoŭnikam jaho siłavych viedamstvaŭ nie pahražajuć pravavyja nastupstvy praźmiernaha prymianieńnia siły i katavańniaŭ zatrymanych hramadzian. U suviazi z hetym jany zaklikali Niamieččynu pravieści niezaležnaje rasśledavańnie takich złačynstvaŭ. Pry hetym advakaty spasłalisia na tak zvanuju ŭniviersalnuju jurysdykcyju, jakaja praduhledžvaje mahčymaść pryciahnieńnia da kryminalnaj adkaznaści za złačynstvy, zabaronienyja mižnarodnym pravam i ździejśnienyja ŭ inšych dziaržavach.
«Našy klijenty čakajuć, što Niamieččyna i ŭ vypadku Biełarusi abvieścić siabie prychilnicaj abarony ŭniviersalnych pravoŭ čałavieka», — zajavili ŭ intervju dpa jurysty, jakija pradstaŭlajuć intaresy dziesiaci žycharoŭ Biełarusi.
Pa słovach jurystaŭ, ich klijenty paskardzilisia na cialesnyja katavańni, katavańni pazbaŭleńniem ježy i snu, abrazy i źniavahi, z pryčyny čaho zdaroŭju ŭsich ich była naniesienaja surjoznaja škoda. U pryvatnaści, jany paviedamili pra toje, što im davodziłasia na praciahu mnohich hadzin stajać na kaleniach sa źviazanymi rukami. «U cełym dziejańni ŭładaŭ možna nazvać tolki źvierskimi», —adznačyli advakaty.
