Fota pixabay.com.
U Indyi praciahvajecca čarhovaja i samaja trahičnaja dla hetaj krainy chvala pandemii kavidu. Pa stanu na 4 maja, tolki pa aficyjnych źviestkach, ad kavidu pamierli 222 tysiačy žycharoŭ Indyi, a kolkaść zaražeńniaŭ składaje bolš za 20 miljonaŭ. Realnyja ličby, imavierna, našmat vyšejšyja: u słabaraźvitaj Indyi naładzić paŭnavartasnaje vyjaŭleńnie chvorych nierealna.
U takich umovach uźnik novy štam kavidu — B.1.617.
Asnoŭnyja simptomy indyjskaha štama nie źjaŭlajucca niečym unikalnym dla kavidu. Heta vysokaja tempieratura, ustojlivy kašal i strata niuchu, smaku abo ich źmieny, piša onet.pl.
Ale pry hetym indyjski štam moža vyklikać i nie zusim zvykłyja dla kavidu simptomy. Siarod ich bol u horle i hałaŭny bol, nasmark, syp, niastraŭnaść, suchaść u rocie, młosnaść, dyjareja i pačyrvanieńnie vačej. Pry hetym u čałavieka ź indyjskim štamam moža zusim nie być lichamanki, zvykłaha simptoma kavidu, abo jana moža źjavicca ŭ jaho paźniej za astatnija simptomy. Tamu ludzi, infikavanyja takim štamam, časta nie razumiejuć, što ŭ ich kavid, i zaražajuć inšych.
Indyjski štam kavidu maje try mutacyi — E484Q, L452R i P681R. Pieršaja ź ich robić virus bolš zaraznym, druhaja mutacyja dazvalaje jamu zaražać ludziej, niahledziačy na najaŭnaść u ich kryvi antycieł (naprykład, kali raniej čałaviek pierachvareŭ na kavid). Pakul nieviadoma, ci moža indyjski štam zaražać tych, chto prajšoŭ vakcynacyju. Ale naŭrad ci adna mutacyja zdolnaja całkam niejtralizavać dziejnaść vakcyn.
Infiekcyjanist Trupci Hiłada z Mumbaja tłumačyć, što, niahledziačy na najaŭnaść roznych pryčyn ciapierašniaha razmachu kavidu ŭ Indyi, hałoŭnaja siarod ich — heta jakraz źjaŭleńnie indyjskaha štama. Novy varyjant pieradajecca vyklučna lohka, tamu na vyklikany im kavid chvarejuć cełyja siemji. Navat paśla adnoj viačery ŭ kampanii rodnych ci siabroŭ možna zachvareć. Ekśpiert taksama śćviardžaje, što padčas minułaj chvali kavidu šmat zachvarełych nie mieli simptomaŭ, ale ciapier prykmiety chvaroby vyražanyja ŭ našmat bolšaj kolkaści ludziej.
