U lutym mastaku Alesiu Puškinu sud u Krupkach prysudziŭ 580 rubloŭ štrafu za bieł-čyrvona-bieły ściah nad ułasnaj chataj u miastečku Bobr, jaki sudździa paličyła pikietavańniem. Štraf Aleś Puškin nie paśpieŭ apłacić.
30 sakavika mastak byŭ zatrymany ŭ vioscy Žyličy Kiraŭskaha rajonu, dzie jon pracavaŭ na restaŭracyi pałacu Bułhakaŭ. Ciapier jaho ŭtrymlivajuć u haradzienskim izalatary. Ciapier Aleś Puškin — fihurant kryminalnaj spravy, jakuju pačała haradzienskaja prakuratura pavodle č. 3 art.130 Kryminalnaha kodeksu (raspalvańnie varažniečy). Pavodle prakuratury, «za ŭčynieńnie naŭmysnych dziejańniaŭ, nakiravanych na reabilitacyju i apraŭdańnie nacyzmu».
Padstavaj dla hetaha staŭ partret antysavieckaha padpolščyka Jaŭhiena Žychara «z aŭtamatam na plačy», jaki byŭ vystaŭleny ŭ pryvatnym «Centry haradzkoha žyćcia».
«Hety dakument pra štraf pajšoŭ na pracu Puškina ŭ «Biełrestaŭracyju», Aleś tudy adnios papiery, i buchhalteryja pavinna była hetyja hrošy zapłacić. Ale tam nia tak chutka heta robicca, pieršy miesiac jana nie zapłaciła, i syšoŭ termin hetaha štrafu», — kaža Janina.
19 krasavika pryjechali supracoŭniki adździełu prymusovaha vykanańnia Krupskaha rajonu i apisali majomaść u domie mastaka.
«Ale tut majomaść ścipłaja, jany naźbirali tolki na 240 rubloŭ. Apisali televizar tryccacihadovaj daŭniny, ladoŭniu, pralnuju mašynu, hitaru, jakuju maje vučni padniali sa śmietnicy, prylapili struny i mnie padaryli. Chacieli taksama apisać cymbały, ale ja skazała, što dačka vučycca ŭ muzyčnaj škole na cymbałach, i jany pakinuli».
Pavodle Janiny, paśla zatrymańnia Alesia Puškina joj pryjšło 7 listoŭ z adździełu prymusovaha vykanańnia. U pieršym, jaki jana atrymała, było patrabavańnie apłacić štraf. Janina ździŭlajecca, što hetyja listy dasyłali siamji, a nie adrasatu.
«Dasyłajcie tudy, dzie znachodzicca adrasat, a čaho vy šlacie tudy, dzie jaho niama?, — kaža jana. — Jakraz 20 krasavika Puškinu naličvali zarobak na kartku i voś z hetaha zarobku štraf aŭtamatyčna apłaciŭsia».
Na nastupny dzień Janinie patelefanavali z adździełu prymusovaha vykanańnia Krupskaha rajonu i paviedamili, što dakumenty pierapišuć i aryšt budzie źniaty.
Užo dvojčy sudzili pa kryminałkach — za pierakreśleny ściah BSSR i hnoj dla Łukašenki. Chto taki Aleś Puškin?
