Fota pixabay.com
Viadoma, što ijanizavalnaja radyjacyja moža škodzić DNK u kletkach, jakija traplajuć pad jaje ŭpłyŭ, ale dahetul nie było jasna, jak jana ŭpłyvaje na jajcakletki i śpiermatazoidy. Zhodna z adnoj z teoryj, mutacyi ŭ hetych kletkach mahli być pieraniesienyja ŭ nastupnyja pakaleńni, što vyklikała b u naščadkaŭ achviar radyjacyi razłady raźvićcia ci ankałahičnyja zachvorvańni, tłumačyć Guardian.
Heta vyrašyŭ pravieryć doktar Styvien Čenak z Nacyjanalnaha instytuta ankałohii (ZŠA). Razam z kalehami Čenak vyvučyŭ hienomy 130 dziaciej, čyje baćki abo ŭdzielničali ŭ likvidacyi nastupstvaŭ avaryi na Čarnobylskaj AES, abo byli evakuiravanyja ź blizkich haradoŭ i viosak. Usie dzieci byli začatyja paśla avaryi, i hienomy ich baćkoŭ taksama byli vyvučanyja.
Niahledziačy na toje, što baćki hetych dziaciej pieranieśli ŭpłyŭ vysokaha ŭzroŭniu radyjacyi, u hienomie dziaciej navukoŭcy nie zafiksavali pavyšanaj kolkaści mutacyj. Takija mutacyi mahli naziracca, naprykład, u kryvi baćkoŭ, ale navukoŭcy nie znajšli dokazaŭ pieradačy mutacyj praz pałavyja kletki.
Praca, apublikavanaja ŭ časopisie Science, nie prosta pašyraje našy viedy pra toje, jak radyjacyja ŭździejničaje na ludziej. Jana taksama pavinna ŭpeŭnić tych, chto paciarpieŭ u katastrofach z vykidami radyjacyi, naprykład, u avaryi na japonskaj AES Fukusima-1, što dla ich biaśpiečna viarnucca dadomu ci zavieści dziaciej.
