«Rehijanalnaja hazieta» pahutaryła z Andrejem paśla vyzvaleńnia pra sud, byt u SIZA i jak prachodzić adaptacyja da žyćcia pa-za kratami.
«Ja chacieŭ da leta być na voli»
My damovilisia sustrecca z Andrejem kala jaho doma ŭ Vilejcy. Sysun žyvie ŭ adnym sa spalnych mikrarajonaŭ amal 30-tysiačnaha horada. U dvarach biehaje šmat dziaciej, jany hulajuć i hučna kryčać. Padčas hutarki były źniavoleny ŭvieś čas azirajecca na dziciačy kryk dy i na luby mocny huk.
U vieraśni 2020 hoda Andrej u kampanii siabroŭ zrabiŭ nadpisy ŭ padjeździe adnaho z damoŭ, jaki znachodzicca niepadalok.
«Žyvie Biełaruś!», «Ł…, sychodź!» i «3%» — hetyja nadpisy orhany razhladali jak psavańnie majomaści, a materyjalnuju škodu acanili ŭ 167 rubloŭ.
— Mianie nie zatrymlivali ŭ vieraśni. Praź niejki čas užo pačalisia śledčyja dziejańni. Pryjechali da taho doma, zapytali: «Hety?». Ja skazaŭ, što hety. I ŭsio.
Pra kryminalnuju spravu Sysun daviedaŭsia, kali jaho zatrymali ŭ Vilejcy ź bieł-čyrvona-biełym ściaham i dali 10 sutak administracyjnaha aryštu. Užo ŭ izalatary ŭ jaho zapytali supracoŭniki pra kryminalnuju spravu za psavańnie majomaści, jakuju była zaviedziena suprać jaho.
Andrej znachodziŭsia na voli da suda. Pasiadžeńniaŭ było ŭsiaho dva — 28 i 29 śniežnia 2020 hoda. Na pieršym jon admoviŭsia ad advakata, bo pryznaŭ vinu i nie bačyŭ sensu ŭ abaroncy. Na druhim pasiadžeńni admoviŭsia vystupać u sprečkach bakoŭ i z apošnim słovam.
— Usio vielmi chutka adbyłosia. Vystupali niejkija śviedki, jakich ja ŭpieršyniu bačyŭ. Byŭ adzin mužčyna tam. Jamu sudździa kaža, ci paznaje jon abvinavačvajemaha. Toj pačaŭ hladzieć na ŭsich u zale, nie moh paznać. Sudździa havoryć mnie: «Vy ŭstańcie, bo zaraz nie na taho jašče pakaža». Mužyk toj pačaŭ kazać, što bačyŭ mianie, što ja napisaŭ drenna pra našaha baćku.
Sudździa suda Vilejskaha rajona Taćciana Borys pryznała Sysuna vinavatym i pryznačyła pakarańnie — 3 miesiacy aryštu. Mužčyna ŭspaminaje słovy, jakija pačuŭ na sudzie: «Dobra, što ciabie sudziać pa hetym artykule, a nie jak inšych pa chulihanstvie».
Uładzimira Atroščyka, jaki byŭ u kampanii z Sysunom u toj vieraśnioŭski viečar i nanosiŭ nadpisy, taksama asudzili. Jon pavinny byŭ siadzieć na damašniaj «chimii», ale parušyŭ režym, tamu jaho adpravili na dva z pałovaj hady ŭ kałoniju.
Try miesiacy za kratami
U sudovaj zale Andreja nie zatrymali, jon byŭ na voli da 18 studzienia.
— Ja sam patelefanavaŭ śledčamu. Kažu, a kali mianie zabiaruć, užo čas idzie. Ja chacieŭ da leta być na voli.
Pa słovach Andreja, jamu skazali, što zhubili niejkija dakumienty, tamu jaho pakul nie adpravili adbyvać pakarańnie. 19 studzienia ŭsio-taki vilejčuka adpravili pa etapu.
— Žodzina, Hrodna i paśla narešcie Baranavicki SIZA. Ščyra skažu, što ŭ Žodzinie było dobra, kali paraŭnoŭvać ź inšymi miescami: karmili, ty moh paspać, rabić što chočaš, — uspaminaje Sysun.
Vilajčuk udakładniaje, što jaho nie sadžali ŭ adnu kamieru razam z palityčnymi. Jon ličyć, što heta rabili admysłova. Pa jaho słovach, palityčnych rassadžvali praź niekalki kamier. Paśla prybyćcia ŭ Baranavicki SIZA vilejčuka pastavili na ŭlik, jak «schilnaha da ekstremisckich i destruktyŭnych dziejańniaŭ».
— Kožnyja paŭhadziny adčyniałasia «karmuška», ja pavinny byŭ nazvać svajo imia, artykuł, termin pakarańnia i što, maŭlaŭ, schilny da ekstremizmu. Ciahnułasia tak prykładna miesiac, a potym, napeŭna, jany palenavalisia rabić heta.
Pavodle Andreja Sysuna, kali jaho etapavali ŭ Baranavicki SIZA, sinich birak — tyja, chto «schilny da ekstremizmu» — jon nie bačyŭ. Pa jaho słovach, «schilnych da ekstremizmu» ŭ SIZA paznačajuć u kartkach, a nie ŭ adzieńni.
— Palityčnych stała bolš, kali vyzvalaŭsia. Ja viedaŭ, što tam u SIZA siadziać chłopcy pa «pinskaj spravie», davoli šmat ich tam. Ale ź imi nikoli nie pierasiakaŭsia.
Andrej uspaminaje, što da jaho sadzili ludziej, jakija sprabavali vyśvietlić, čamu jon trapiŭ za kraty i naohuł daviedacca pra ŭsio, što datyčycca Sysuna. Pa słovach byłoha viaźnia, za heta administracyja davała hetym ludziam cyharety. Čas za kratami palitviazień baviŭ za čytańniem knih. Listoŭ prychodziła nie šmat, a niekatoryja listy ad siabroŭ uvohule nie dajšli.
— U mianie doma lažać stosy listoŭ, ale heta nie ŭsie. Ja tak razumieju, što niekatoryja albo nie dachodzili, albo ich nie prapuskali cenzary. Pisali chłopcy ź Vilejki, ale ja ad ich listy ŭ SIZA tak i nie atrymaŭ.
Što takoje być palitviaźniem i što z Andrejem paśla vyzvaleńnia
25 lutaha biełaruskija pravaabarončyja arhanizacyja zajavili, što abmiežavańnie voli Andreja Sysuna źjaŭlajecca palityčna matyvavanym, a samoha Sysuna pryznali palityčnych źniavolenym.
— Daviedaŭsia, što pryznali mianie palitźniavolenym ź lista, jaki mnie napisali. Ci byli ad hetaha jakija-niebudź bonusy? Nie.
Sysuna vypuścili z-za krataŭ 18 krasavika, ale jon uvieś čas u SIZA dumaŭ, što hetaha nie zdarycca.
— Vychodžu, mnie dajuć papierku ab vyzvaleńni i adrazu zabirajuć. Dumaŭ voś tak budzie, kali siadzieŭ. Dumaŭ, što nie adpuściać. Dumaŭ, što adviazuć na Vaładarku.
Andrej vyjšaŭ, kala SIZA u Baranavičach jaho sustreła hramadzianskaja žonka: «Sieŭ u mašynu i kažu: usio, pajechali adsiul!».
Na voli vilajčuk znachodzicca mienš za tydzień. Jon kaža, adaptacyja da zvyčajnaha žyćcia prachodzić narmalna. Ciapier Andrej šukaje pracu.
— Mnie treba kožnuju niadzielu chadzić na prafhutarki, pakul pracu siabie nie znajdu. Treba adznačacca i jość niekatoryja abmiežavańni.
