Fota Jaŭhiena Sasiury
Hrafici zroblena ŭ miežach prajekta, jaki realizujecca Miorskim rajvykankamam, hramadskaj arhanizacyjaj «Achova ptušak Baćkaŭščyny» i Łatvijskim sielskim forumam pry finansavaj padtrymcy ES.
Eskiz hrafici stvaryŭ stryt-artar Aleś Kontra, a raśpisaŭ ścianu jaho kaleha Jaŭhien Sasiura.
— Kab raspracavać kancepcyju hrafici, ja pačaŭ šukać materyjały pa historyi Dzisienščyny, — raskazaŭ Aleś. — Było šmat idej, ale samaj vydatnaj padałasia kancepcyja ŭviekaviečyć Drazdoviča, jaki pačaŭ navučańnie mienavita ŭ Dzisienskaj himnazii i stupiŭ tut na mastacki šlach, robiačy zamaloŭki miascovych krajavidaŭ. Jazep Drazdovič šmat padarožničaŭ, ale časta viartaŭsia siudy. Jon tut nie tolki malavaŭ hrafičnyja piejzažy z natury, ale i zapisvaŭ dla słoŭnikaŭ narodnuju leksiku kraju, falkłor, skłaŭ zbornik «Pieśni Dzisienščyny». Na eskiz ja dadaŭ niekalki niabiesnych abjektaŭ z bazavaj astranomii — navuki, jakaja paŭpłyvała na Drazdoviča. Piejzaž na eskizie — ruki Drazdoviča, heta jaho rodny zaścienak Puńki, dzie jon naradziŭsia i žyŭ u malenstvie.
Fota Jaŭhiena Sasiury
Ideja i malunak vielmi spadabalisia miascovym žycharam. Padčas rośpisu ściany mnohija padychodzili da Jaŭhiena i dziakavali.
— Pakolki podpis ja zrabiŭ u samym kancy, minaki časta pytalisia, kaho heta ja maluju, — raskazaŭ Jaŭhier Sasiura. — Bolšaść nie viedali, chto taki Drazdovič. Ale niekalki čałaviek jaho paznali. Adna babula navat raskazvała, što bačyła ŭ dziacinstvie, jak jon raśpisvaŭ niejkija tkaniny, i padrabiazna apisvała, jak jon vyhladaŭ.
Jaŭhien Baran, staršynia Dzisienskaha haradskoha vykanaŭčaha kamiteta, adznačyŭ, što stvareńnie murała — znakavaja padzieja dla Dzisny.
— Heta pieršaje hrafici takoha kštałtu ŭ našym horadzie, i my ŭpeŭnienyja, što jano pryvabić turystaŭ, — kaža jon. — Simvalična i nievypadkova, što akurat pobač z hrafici znachodzicca budynak byłoj vučelni, u jakoj čatyry kłasy skončyŭ Jazep Drazdovič.
Heta nie adzinaje hrafici ŭ Miorskim rajonie, stvoranaje ŭ miežach prajekta. Jazep Drazdovič viadomy svaimi dyvanami-malavankami, i ŭ minułym hodzie ŭ Miorach Aleś Kontra namalavaŭ taki stylizavany dyvan, na jakim možna pabačyć 10 słavutaściaŭ rajona. A ŭ vioscy Pierabrodździe jon raśpisaŭ kramu firmovym paternam Miorščyny, a budynak byłoj takarnaj piłaramy — pryrodna-bytavym siužetam u styli padvojnaha tkactva.
