Deputat Andrej Savinych vysoka acaniŭ pośpiechi biełaruskich biuro, źviarnuŭ uvahu, što jany ŭdzielničali ŭ arbitražnych sprečkach na sotni miljonaŭ dalaraŭ, jakija inviestary pradjaŭlali krainie. Savinych spytaŭ u ministra justycyi, ci nie stvoryć likvidacyja biuro ciažkaści z pryciahnieńniem zamiežnych inviestycyj.
Ministr Aleh Śližeŭski, jaki pradstaŭlaŭ zakonaprajekt, zajaviŭ, što nie staŭ by «rabić vysnovu ab tym, što za apošnija dziesiać hadoŭ dasiahnieńniem źjaŭlajecca sam fakt najaŭnaści advakackich biuro».
— Ja dumaju, što treba adčuvać zadavalnieńnie ad taho, što kankretnyja advakaty nabyvajuć vopyt i majuć niekatory niadrenny, dastatkova vysoki ŭzrovień viedaŭ, prafiesijanalizmu dla taho, kab adstojvać intaresy našych subjektaŭ haspadarańnia i Respubliki Biełaruś u cełym, — rastłumačyŭ čynoŭnik. — Źmieny, jakija prapanujucca, nie ciahnuć za saboj stratu hetymi advakatami mahčymaści i dalej pracavać sa svaimi klijentami. Z adnaho boku, možna pry žadańni stvaryć subjekt haspadarańnia, jaki budzie mieć licenziju na akazańnie jurydyčnych pasłuh, i dalej praciahvać supravadžeńnie biznes-pracesaŭ z klijentami, ź jakimi ŭžo napracavanyja suviazi. Ź inšaha boku, majučy licenziju advakata, možna praciahnuć pracu ŭ jurydyčnaj kansultacyi i hetak ža supravadžać biznes-pracesy svaich klijentaŭ, pradstaŭlać ich intaresy ŭ sudzie. Surjoznaha ŭpłyvu na supravadžeńnie biznes-pracesaŭ, vialikich ryzyk my nie bačym.
U vypadku pryniaćcia papravak advakatam, jakija pracujuć indyvidualna i ŭ biuro, prapanujuć pierajści ŭ jurydyčnyja kansultacyi, heta adziny varyjant praciahu dziejnaści. Pakul niezrazumieła, jak heta budzie pracavać na praktycy, uličvajučy, što ŭ advakackich biuro byli sfarmavanyja cełyja kamandy jurystaŭ, jakija pracavali pa supravadžeńni ździełak, pradstaŭleńni biznesu ŭ sudach.
Staršynia Biełaruskaj respublikanskaj kalehii advakataŭ Viktar Čajčyc na prośbu Tut.by prakamientavać źmieny ŭ zakon rastłumačyŭ, što svaje prapanovy kalehija ŭ Miniust adpraŭlała.
— My budziem pracavać u tych umovach, jakija buduć zabiaśpiečany pavodle zakanadaŭstva, i zrobim usio mahčymaje, kab hramadzianie atrymali jurydyčnuju dapamohu, — zajaviŭ staršynia BRKA.
