Uładzimir Antonavič naradziŭsia 25 sakavika 1935 hoda ŭ vioscy Dvarec Vilejskaha pavieta Vilenskaha vajavodstva. Skončyŭ fakultet niamieckaj movy Minskaha dziaržaŭnaha piedahahičnaha instytuta zamiežnych moŭ, pracavaŭ vykładčykam niamieckaj movy, inžynieram-pierakładčykam.
Z 1966 hoda žyŭ u Viciebsku. Pracavaŭ nastaŭnikam niamieckaj movy ŭ SŠ №20, Viciebskim industryjalnym technikumie. Ad 1982 hoda — starejšy vykładčyk, u 1998-2005 hadach — zahadčyk kafiedry Viciebskaha dziaržaŭnaha ŭniviersiteta imia Mašerava. Nieadnarazova ładziŭ dla svaich studentaŭ navučalnyja vandroŭki ŭ Hiermaniju, padtrymlivaŭ ciopłyja stasunki z mnohimi byłymi navučencami ciaham niekalkich dziesiacihodździaŭ.
Tvory Uładzimira Papkoviča źjavilisia ŭ druku ŭ 1962 hodzie. Pieršy zbornik vieršaŭ — «Na dośvitku» — vyjšaŭ u 1978 hodzie. Aŭtar bolš jak 10 knih paezii, šmatlikich pierakładaŭ vieršaŭ i prozy ź niamieckaj movy na biełaruskuju. Pierakłaŭ na niamieckuju movu paemu «Taras na Parnasie», vieršy Davida Simanoviča. Siabra Sajuza piśmieńnikaŭ SSSR z 1981 hoda. Siabra Sajuza biełaruskich piśmieńnikaŭ.
Łaŭreat premii «Suzorje muz» imia Uładzimira Karatkieviča.
Vydatny znaŭca litaratury i vyjaŭlenčaha mastactva, Uładzimir Antonavič byŭ žadanym hościem na vystavach, prezientacyjach i tvorčych sustrečach, dla kožnaha znachodziŭ trapnyja i dobrazyčlivyja pažadańni. U apošnija hady, kali zdaroŭje padvodziła, dasyłaŭ siabram i znajomym ciopłyja słovy praz elektronnuju poštu, z dapamohaj blizkich rehularna vykładaŭ staryja i novyja vieršy i pierakłady na fejsbuku.
Za doŭhaje i niaprostaje žyćcio Uładzimir Papkovič šmat kaho sahreŭ uvahaj i spahadaj. Usie my smutkujem, raźvitvajučysia ź im.
Raźvitańnie adbudziecca ŭ paniadziełak, 12 krasavika, ŭ rytualnaj zale «Śvieča» pa vulicy Pietrusia Broŭki, 50/4 z 18:00 da 20:00. Rodnyja prosiać nie prynosić viankoŭ u suviazi z tym, što niabožčyka źbirajucca kremiravać, a pachavańnie adbudziecca paźniej.
