Rasijskaja submaryna Delta-4. Zdymak sa spadarožnika.
Śpiecyjalisty pa ŭzbrajeńni i zachodnija čynoŭniki vykazvajuć zakłapočanaść nakont rasijskaj tarpiedy «Pasiejdon-2M39». Jaje raspracoŭka idzie chutkimi tempami, a sioleta płanujucca dalejšyja vyprabavańni, paviedamlaje CNN.
Heta bieśpiłotnaja małazaŭvažnaja tarpieda pracuje ad jadziernaha reaktara. Jaje hałoŭnaje pryznačeńnie — abychod bierahavoj abarony na marskim dnie, jakuju majuć ZŠA.
Pa słovach rasijskich čynoŭnikaŭ, pryłada dastaŭlaje bojehałoŭku vahoju niekalki miehaton, ataka jakoj zrobić prybiarežnyja terytoryi nieprydatnymi dla žyćcia na praciahu dziesiacihodździaŭ.
Kiraŭnik narviežskaj raźviedki vice-admirał Nils Andreas Stensanes (Nils Andreas Stensønes) adznačaje, što «Pasiejdon-2M39» moža aceńvacca jak častka novaha typu zbroi jadziernaha strymlivańnia, jakaja znachodzicca na stadyi vyprabavańniaŭ, ale maje ŭpłyŭ daloka za miežami rehijona, u jakim jaje teścirujuć. Nils Andreas aścierahajecca, što navat vyprabavańni takoj jadziernaj zbroi mohuć mieć surjoznyja ekałahičnyja nastupstvy.
Kampanija kaśmičnych technałohij Maxar pakazała spadarožnikavyja zdymki, jakija padrabiazna apisvajuć chutkuju i bieśpierapynnuju razbudovu rasijskaj vajskovaj bazy i abstalavańnia na arktyčnym uźbiarežžy krainy, a taksama budavańnie padziemnych schoviščaŭ, vierahodna, dla «Pasiejdona» i inšaha novaha vysokatechnałahičnaha ŭzbrajeńnia.
Rasijskaja technika ŭ rajonie Krajniaj Poŭnačy taksama ŭklučaje bambaviki, źniščalniki i novyja radyjołakacyjnyja sistemy niedaloka ad uźbiarežža Alaski.
Usie vajskovyja bazy znachodziacca na terytoryi Rasii i źjaŭlajucca častkaj jaje zakonnaj abarony miežaŭ. Adnak aficyjnyja asoby ZŠA zaniepakojenyja, što hetyja siły mohuć vykarystoŭvacca dla ŭstalavańnia kantrolu nad rajonami Arktyki, jakija pastupova vyzvalajucca ad ildu ŭ vyniku paciapleńnia klimatu.
Lod rastaje chutčej, čym mierkavali navukoŭcy, što pryviadzie da rezkich źmien z punktu hledžańnia dostupu da rehijona ŭ bližejšaje dziesiacihodździe.
Amierykanskija čynoŭniki taksama ličać, što Rasija imkniecca paŭpłyvać na Paŭnočny marski šlach — sudnachodnuju liniju, jakaja prachodzić uzdoŭž paŭnočnaha ŭźbiarežža Rasii. Paŭnočny marski šlach udvaja skaračaje čas, jaki ciapier patrabujecca marskim kantejnieravozam, kab trapić z Azii ŭ Jeŭropu praz Suecki kanał. Ekśpierty zaniepakojenyja, što Rasija naviazvaje svaje praviły sudnachodstva, jakija nie zaŭsiody adpaviadajuć mižnarodnamu pravu.
