Fota Depositphotos.com
U 2020 hodzie abjomy vytvorčaści «zialonaj» elektraenierhii ŭ ES pavialičylisia na 10%. U vyniku 27 krain upieršyniu atrymali bolš elektryčnaści z uznaŭlalnych krynic enierhii, čym z tradycyjnych. Dola vuhalu, nafty i hazu źniziłasia da 37%, u toj čas jak viecier, sonca, hidraenierhija i bijamasa dali 38% ad usioj elektryčnaści ŭ ES, paviedamlaje DW.
Da takich vysnoŭ pryjšli dva analityčnyja centry (brytanski Ember i niamiecki Agora Energiewende), jakija daśledujuć pytańni enierhietyki i hłabalnaj transfarmacyi enierhietyki. U ich dakładzie adznačajecca, što heta dla Jeŭropy važny krok da pierachodu na čystuju enierhiju.
Chutčej za ŭsio pavialičvajecca vykarystańnie soniečnaj i vietravoj enierhietyki. Soniečnyja i vietravyja elektrastancyi vyrabili amal adnu piatuju častku ŭsioj elektryčnaści ES.
Na 10% źniziłasia vytvorčaść elektryčnaści na atamnych elektrastancyjach. Ekśpierty adznačajuć, što heta najvialikšy spad za ŭsiu historyju atamnaj enierhietyki. Heta tłumačycca zakryćciom enierhabłokaŭ u Šviecyi i Hiermanii, a taksama prablemami na AES u Francyi i Bielhii ŭ 2020 hodzie.
Dakład Ember i Agora Energiewende paćviardžaje, što ŭ rasijskich eksparcioraŭ vuhalu niama pierśpiektyŭ na jeŭrapiejskim rynku. Vykarystańnie vuhalu za 2020 hod źniziłasia amal va ŭsich krainach ES. Bolš za toje, bolšaść jeŭrapiejskich krain majuć namier całkam admovicca ad vuhalu ŭ elektraenierhietycy da 2030 hoda.
Bolš šancaŭ na raźvićcio ŭ Jeŭropie majuć rasijskija eksparciory hazu, u pryvatnaści «Hazpram» i «Navatek». Pryrodny haz pavialičvaje svaju dolu na jeŭrapiejskim rynku — letaś dola hazu dasiahnuła 20%, adnak uznaŭlalnyja krynicy enierhii stanoviacca ŭsio bolš surjoznym kankurentam.
Niderłandy — adna z krain, jakaja ŭ 2020 hodzie pavialičyła vytvorčaść elektraenierhii na hazavych elektrastancyjach. Niderłandy atrymlivajuć rasijski haz pa trubapravodzie «Paŭnočny patok».
Hazavaja hienieracyja vyrasła taksama ŭ Polščy i Hrecyi. Adnak da 2023 hoda Polšča źbirajecca całkam admovicca ad pastavak «Hazprama» i tamu prakładvaje ciapier hazapravod z Narviehii Baltic Pipe.
Hrecyja atrymlivaje rasijski haz pa «Tureckim patoku», ale ŭžo sioleta kraina atrymaje alternatyŭny azierbajdžanski haz.
Tamu pavieličeńnie doli pryrodnaha hazu ŭ elektravytvorčaści ES nie aznačaje, što heta aŭtamatyčna pryviadzie da pavieličeńnia zakupu rasijskaha pryrodnaha hazu.
