Fota Depositphotos.com
Pčoły źbirajuć pyłok i niektar z kvietak, kab zatym pieratvaryć jaho ŭ miod, što składajecca z fruktozy i hlukozy. Zasnavalniki kampanii MeliBio vyrašyli ažyćciavić hety praces u łabaratoryi z dapamohaj mikraarhanizmaŭ, ale biez udziełu pčoł.
Za apošnija niekalki hadoŭ raślinnyja alternatyvy miasu i małočnym praduktam stali vielmi papularnymi. Adnak dla mnohich jany nie padychodziać z punktu hledžańnia smaku, tekstury abo dastupnaści, piša BBC.
Tamu startap MeliBio sprabuje vykarystoŭvać fiermientacyju dla vytvorčaści viehanskich praduktaŭ, u pryvatnaści miodu, jakija bijałahična buduć identyčnyja realnym. Kampanija spadziajecca pačać pastaŭki viehanskaha miodu ŭžo sioleta.
U pracesie fiermientacyi mikraarhanizmy pierapracoŭvajuć peŭnyja pradukty i vyłučajuć novyja. Naprykład, bradžeńnie draždžej moža pieratvaryć cukar u śpirt.
Adnak kali padabrać peŭnyja mikraarhanizmy i vybrać dla ich pravilnyja pažyŭnyja rečyvy, to možna atrymać zusim roznyja kančatkovyja pradukty — ad małaka da miodu.
Taki padychod vykarystoŭvajuć i inšyja kampanii, naprykład brytanski startap Better Dairy. Jaho kiraŭniki stvaryli technałohiju, z dapamohaj jakoj u vyniku fiermientacyi draždžej atrymlivajecca nie śpirt, a małako i syr.
Anałahičnuju technałohiju vykarystoŭvaje kampanija z San-Francyska Clara Foods, jakaja raspracoŭvaje jaječnyja białki, jakija ŭžo voś-voś źjaviacca ŭ prodažy. Pradstaŭniki kampanii płanujuć stać najvialikšymi vytvorcami jaječnaha białku da 2028 hoda.
Malekularna atrymlivajucca identyčnyja pradukty, jakija, bolš za toje, majuć taki ž smak, jak i pradukty žyviolnaha pachodžańnia. Padobnyja pradukty mohuć stać sapraŭdnym praryvam u viehanskim charčavańni.