RBK udałosia pieradać pytańni bankiru i palityku, jaki znachodzicca z červienia minułaha hoda pad aryštam, i atrymać na ich adkazy.
Pra toje, što siłavyja razhony apazicyjnych akcyj dazvolili vyratavać krainu, utrymać niezaležnaść, pieraškodzili pieradačy ŭłady aliharcham i zachavali pradpryjemstvy ŭ pracoŭnym stanie, kazali čynoŭniki i prychilniki Łukašenki, u tym liku ŭdzielniki «Usiebiełaruskaha narodnaha schodu».
Babaryka nazyvaje pamyłkovym tezis ab vyratavańni krainy, bo, na jahonuju dumku, jano mahčymaje «tolki ad zamiežnaj pahrozy, jakoj nie było»: «Miratvorčyja vojski NATO i ściahnutyja da miažy tanki i samaloty byli tolki na ekranach BT i ŭ infarmacyjnych paviedamleńniach dziaržaŭnych ŚMI». Na jaho dumku, kiraŭnictva krainy ratavała «ŭłasnuju ŭładu ad ludziej, jakija chacieli źmianić žyćcio da lepšaha, i dla hetaha hatova było vykarystoŭvać navat pryciahnieńnie zamiežnych Uzbrojenych Sił».
«Jak i ŭ luboha čałavieka, u dziaržavy niezaležnaść abapirajecca na ekanomiku. Kali nie možaš zabiaśpiečyć sam siabie, a biareš hrošy na svajo ŭtrymańnie ŭ baćkoŭ, svajakoŭ ci siabroŭ, to kazać ab niezaležnaści składana», — tłumačyć jon. Za minuły hod zamiežny doŭh Biełarusi vyras na $1,4 młrd, abo bolš čym na 8%, pryvodzić prykład Babaryka. Biełaruś i tak znachodziłasia ŭ mocnaj ekanamičnaj zaležnaści ad adnaho ci dvuch rynkaŭ zbytu i pryciahnieńnia finansavańnia, a «ciapier ni ab jakoj šmatviektarnaści i dyviersifikacyi kazać nie davodzicca», — praciahvaje jon.
«Znachodziačysia pad sankcyjami bolšaj častki cyvilizavanaha śvietu, spadziavacca na pašyreńnie našych mahčymaściaŭ na rynkach raźvitych krain i krain, jakija raźvivajucca, na žal, nielha. Kožny dzień my vyprošvajem hrošy ŭ partnioraŭ, prykryvajučysia tezisami ab libieralizacyi i napaminkami «ab braterskaj lubovi», prajaŭlenaj u akopach vojnaŭ. A ciapier u nas navat tearetyčnaj alternatyvy inšych partnioraŭ nie zastałosia», — adznačaje Babaryka.
Tezis ab vyratavańni krainy ad aliharchaŭ taksama niasłušny, upeŭnieny Babaryka. «Što tyčycca mahčymych «aliharchaŭ» unutry krainy, to, vidavočna, jany ŭžo ŭbudavanyja ŭ dziejnuju sistemu ŭłady i dakładna nie pretendavali na ŭładu», — ličyć jon.
Na jaho dumku, kali ŭłada vykarystoŭvaje arhumient ab tym, što ŭ vypadku revalucyi začyniacca biełaruskija pradpryjemstvy, jana taksama ŭvodzić ludziej u zman. «Prablema ŭžo mnohich dziesiacihodździaŭ — nam abiacali znakamityja «pa piaćsot». A siońnia pra heta ŭžo havorki nie viadziecca. Atrymlivajecca, što z kožnym hodam my ŭsio bolš pracavali, ale pracavali tolki dziela pracy, i našy pradpryjemstvy zachoŭvajucca tolki dla zachavańnia», — adznačaje Babaryka.
Akramia taho, dadaje jon, lidary apazicyi nikoli nie kazali, što zakryćcio pradpryjemstvaŭ abo ich prodaž — adziny i niepaźbiežny varyjant dziejańniaŭ.
«Isnuje mnostva varyjantaŭ «niesiłavoha» pierachodu da bolš efiektyŭnaj ekanomiki, aprabavanych i realizavanych u inšych krainach. Tamu «strašyłki» pra masavaje biespracoŭje i rasprodaž «spadčyny» bolš nahadvajuć historyi pra babajku abo čupakabru. Nichto nie bačyŭ, ale ŭsie bajacca», — adznačaje jon.
Abapiracca na hetyja strašyłki, na dumku Babaryki, možna, kali chočacca zachavać «aryjencir na sastarełuju sistemu kiravańnia, zasnavanuju na chłuśni, nianaviści i strachu». «Ale zachavać niešta niemahčyma. U pryrodzie niama praciahłaha stanu ŭstojlivaj raŭnavahi. Vy raźvivajeciesia ci padajecie ŭniz. Možna tolki rehulavać chutkaść ruchu», — upeŭnieny jon.
