Uviečary 3 sakavika źnikła žycharka Łondana, 33-hadovaja śpiecyjalistka pa markietynhu Sara Evierard. A 21-j hadzinie jana vyjšła ad siabroŭki, jakuju naviedvała ŭ rajonie Kłepchem, i pajšła pieššu dachaty. Na praciahu 15 chvilin Sara hutaryła pa telefonie sa svaim bojfrendam i damoviłasia na nastupny dzień ź im sustrecca. U 21.30 jaje apošni raz bačyli na zapisach kamiery videanazirańnia.
Na nastupny dzień, kali brytanka nie pryjšła na sustreču z bojfrendam, jon źviazaŭsia z palicyjaj. 10 sakavika cieła Sary było znojdziena ŭ lesie hrafstva Kient, prykładna za 100 kiłamietraŭ ad miesca jaje źniknieńnia. Achviaru identyfikavali praz dva dni z dapamohaj stamatałahičnych zapisaŭ, adnak ekśpierty nie zdoleli vyśvietlić pryčynu jaje śmierci, paviedamlaje «Bi-bi-si».
Apošniaje fota Sary z kamiery videanazirańnia, fota łondanskaj palicyi
U zabojstvie padazrajuć 48-hadovaha palicejskaha Uejna Kazinsa, patrulnaha z Łondana. Ułady hrafstva Kient źbirajucca na hetym tydni pačać śledstva pa fakcie jaje zabojstva. Adnak praca palicyi naŭrad ci zdoleje tak prosta spynić toje, što pačałosia ŭ brytanskim hramadstvie paśla śmierci Sary.
Žančyny z roznych kutkoŭ Złučanaha karaleŭstva pačali rabić u sacyjalnych sietkach dopisy pra toje, jak heta — viartacca pa pustych vulicach dachaty pozna ŭviečary ci nočču. Brytanki pisali i pra toje, što im prychodziłasia rabić, kab zabiaśpiečyć sabie choć niejkuju biaśpieku. Bolš za 120 tysiač łajkaŭ nabraŭ tvit z pytańniem da žančyn pra toje, ci prychodziłasia im prykidvacca, što jany zvoniać pa telefonie, źmianiać maršrut ci navat biehčy paśla taho, jak im na vulicy pahražali mužčyny.
Tak pačałasia hramadskaja kampanija Reclaim these streets («Vierniem sabie hetyja vulicy»). Brytanki płanavali arhanizavać bolš čym u 40 haradach krainy žałobnyja akcyi pad hetym devizam, ale praz karancin ad hetaha pryjšłosia admovicca. Tym nie mienš niekalki vacht pamiaci ŭsio-tki adbylisia. U rajonie Kłepchem, dzie Saru bačyli ŭ apošni raz, uźnik stychijny miemaryjał. Jaho naviedała navat hiercahinia Kiejt, žonka prynca Uiljama — jak paźniej patłumačyła pres-słužba Bukinhiemskaha pałaca, hiercahinia pamiataje, jak jana była zvyčajnaj maładoj žančynaj i hulała pa načnym Łondanie.
Paśla hetaha sotni žančyn vyrašyli pryjści na akcyju-ŭšanavańnie pamiaci Sary. Uviečary 13 sakavika jany sabralisia la miemaryjała ŭ Kłepchemie, šmat chto z žančyn žadaŭ vykazać tryvohu nakont nizkaha ŭzroŭniu biaśpieki na haradskich vulicach. Adnak akcyja była razahnanaja palicyjaj praz karancinnyja abmiežavańni, i niekatorych z žančyn zatrymali.
Nie ŭsie ź blizkich Sary padtrymali praviadzieńnie subotniaj akcyi. Siabroŭka dziaŭčyny Chielena Edvards vykazałasia pra jaje takim čynam: «Ja vyrašyła nie iści tudy, jak i šmat chto ź jaje siabroŭ. Nie mahu kazać za ich usich, ale maja pryčyna nastupnaja: trahičnuju śmierć majoj siabroŭki skrali. Heta bolš nie ŭšanavańnie jaje pamiaci, heta niešta inšaje — i mnie nie padabajecca toje, čym heta zrabiłasia».
Narodny miemaryjał na miescy akcyi 13 sakavika, fota łondanskaj palicyi
Premjer-ministr krainy Borys Džonsan vykazaŭ hłybokaje zakłapočańnie praz kadry z subotniaj akcyi, na jakich palicyja brutalna aryštoŭvaje žančyn na akcyi. Inšyja brytanskija palityki taksama zapatrabavali ŭ palicyi tłumačeńni. Siarod ich była i ministrka ŭnutranych spraŭ krainy Pryci Patel — jana ž zaklikała pratestoŭcaŭ nie vychodzić na vulicy, pakul u Vialikabrytanii jašče dziejničajuć karancinnyja abmiežavańni. Tym nie mienš u nastupnyja dni sotni žycharoŭ Łondana znoŭ vyjšli na vulicy horada. Za apošnija niekalki dzion akcyi pamiaci Sary prajšli i ŭ niekatorych inšych haradach krainy, u tym liku ŭ Kardyfie, Edzinburhu, Lidsie, Brajtanie i Livierpule.
Palicyja Anhlii i Uelsa ŭžo paabiacała pryniać terminovyja miery, kab źmianić situacyju z vuličnaj biaśpiekaj dla žančyn i dziaŭčat. Siarod hetych mier — dadatkovyja 25 miljonaŭ funtaŭ, kab palepšyć aśviatleńnie i sistemy videanazirańnia. Jość i ekśpierymientalny płan, zhodna ź jakim palicejskija ŭ cyvilnym buduć patrulavać paby i kłuby. Adnak pradstaŭniki lejbarysckaj partyi, jakaja ciapier znachodzicca ŭ apazicyi, ličać miery niedastatkovymi. Pa ich słovach, patrebny realnyja źmieny zakanadaŭstva zamiest płanaŭ z «palicejskimi ŭ prytalenych džynsach».
