Sudździa Viktoryja Šabunia adpraviła Aleha Zubryckaha na 3 hady abmiežavańnia voli z nakiravańniem u papraŭčuju ŭstanovu adkrytaha typu — na «chimiju». Takoje pakarańnie i prasiŭ dziaržabvinavaŭca Arciom Ćviatkoŭ.
Vyrak vynieśli pavodle artykułu 364 Kryminalnaha kodeksu «Hvałt albo pahroza ŭžyvańnia hvałtu ŭ dačynieńni da supracoŭnika orhanaŭ unutranych spraŭ».
Aleha Zubryckaha pieraśledavali za SMS-paviedamleńnie z pahrozami, jakoje jon nibyta dasłaŭ 14 žniŭnia na adras žonki amapaŭca Hanny Navumčyk. Joj abvinavačany musić vypłacić maralnuju kampensacyju ŭ 2500 rubloŭ. Abarona mužčyny zajaviła pra absalutnuju adsutnaść niejkich dokazaŭ.
Śpiarša kryminalnaja sprava budavałasia na paviedamleńni z pahrozami, dasłanym praz Viber 12 žniŭnia 2020 hoda. Ale paśla taho, jak Zubrycki dakazaŭ, što jahony numar nie zarehistravany ŭ Viber, abvinavačańnie źmianili: jamu pastavili ŭ vinu adpraŭku ŭžo SMS-paviedamleńnia, datavanaha 14 žniŭnia.
Padčas sudovaha pracesu abarona Zubryckaha źviartała ŭvahu i na fakt isnavańnia rapartu ad 13 žniŭnia, kali jaho vinavacili za SMS ad 12 žniŭnia. Sudździa Šabunia hetuju i inšyja nieadpaviednaści ŭ pratakołach pakinuła biez uvahi.
Razabracca ŭ sapraŭdnaści dastaŭki SMS-paviedamleńnia, jakoje fihuruje na skrynšocie z materyjałaŭ spravy, dapamahła b ekspertyza mabilnaha telefona Navumčyk. Adnak telefon nichto dla ekspertyzy nia braŭ, a sama paciarpiełaja 4 sakavika zajaviła, što «niespadziavana jaho raźbiła». Jana adniesła jaho da majstra, a toj «pradaŭ na zapčastki».
Hety adziny kaštoŭny rečavy dokaz, jak adznačyła abarona, moh by vyśvietlić usio, ale čamuści byŭ zhubleny. Sud na heta ŭvahi taksama nie źviarnuŭ. Telefon ža Zubryckaha na ekspertyzu addavali, ale nijakaha paviedamleńnia na im nia vyjavili. Jaho, tym nia mienš, Šabunia pastanaviła kanfiskavać.
Žonka amapaŭca Hanna Navumčyk spačatku padała pazoŭ da Zubryckaha ab «maralnaj kampensacyi» pamieram 2500 rubloŭ. Jana «adčuła šok, stres, vydatkavała vialikija sumy na leki. Taksama sprabavała zaciažaryć — nie atrymlivajecca».
Adnak padčas sudovych sprečak 9 sakavika paciarpiełaja raptam admoviłasia ad pazovu. Tady sudździa Šabunia prapanavała «paraicca» i zrabiła pierapynak na niekalki chvilin, paśla čaho Navumčyk zajaviła, što pazoŭ usio ž u sile.
U apošnim słovie Aleh Zubrycki paćvierdziŭ, što nie pisaŭ žoncy amapaŭca ni praz Viber, ni praz SMS. Zajaviŭ, što nia maje nijakaj «palityčnaj varožaści». Svoj prysud jon planuje abskardzić.
