Takoje mierkavańnie TASS vykazaŭ dyrektar rasijskaha Instytuta miedycynskaj parazitałohii, trapičnych i tranśmisiŭnych zachvorvańniaŭ imia Marcinoŭskaha Siečanaŭskaha ŭniviersiteta Alaksandr Łukašaŭ.
«Harantyj, što nie budzie paŭtornaha zaražeńnia, niama. My viedajem, što paŭtornaje zaražeńnie mahčyma, ale my nie viedajem, nakolki heta časta, tamu što my navat pra pieršasnyja vypadki, kolki ludziej u nas choć by adzin raz sustrakalisia ź virusam, viedajem dosyć ćmiana. Paŭtornyja vypadki adsočvać na paradak ciažej, tamu my viedajem, što jany byvajuć, ale nie viedajem, nakolki časta, i pakul my hetuju infarmacyju nie atrymajem, my nosim maski», — skazaŭ ekśpiert.
Łukašaŭ taksama adznačyŭ, što tolki častka — prykładna 10-20% — antyciełaŭ, što vypracoŭvajucca da luboha virusa, efiektyŭnaja suprać jaho, i paŭpłyvać na ich kolkaść vielmi składana.
«Imunnaja sistema apryjory «nie viedaje», jakoje z antyciełaŭ budzie bolš efiektyŭnym, i vypracoŭvaje vypadkovym čynam ceły «puł» antyciełaŭ. Adnak vialikaja častka ź ich nie budzie niejtralizavać virus. U niekatorych vypadkach «lišnija» antycieły mohuć navat pieraškadžać — jany mohuć nie puskać viruśniejtralizujučyja antycieły da virusa», — padkreśliŭ śpiecyjalist.
Pa jaho słovach, bolšaść isnujučych testaŭ pakazvajuć uzrovień usich antyciełaŭ, a nie tolki efiektyŭnych.
«Vyznačyć viruśniejtralizujučyja antycieły možna tolki ŭ śpiecyjalizavanych łabaratoryjach, vykarystoŭvajučy žyvy virus. Nakolki ja viedaju, u Rasii ciapier tolki piać-šeść instytutaŭ mohuć heta zrabić, i jak kamiercyjnaja pasłuha dadzienaje daśledavańnie niedastupnaje», — dadaŭ Łukašoŭ.
Jon nahadaŭ i pra toje, što antycieły znachodziacca ŭ kryvi, a karanavirus, jak minimum u pieršyja dni paśla zaražeńnia, razmnažajecca na ślizistych abałonkach. «Heta značyć, jany nie asabliva pieraškadžajuć zaražeńniu i pieršasnamu razmnažeńniu virusa. Antycieły nie zaŭsiody pryznačanyja dla praduchileńnia zaražeńnia, ale mohuć dapamahčy arhanizmu spravicca ź infiekcyjaj chutka i niezaŭvažna dla čałavieka ci chacia b źnizić vierahodnaść ciažkaj chady zachvorvańnia. Tamu kali šmat antyciełaŭ — heta dobra, ale navat heta nie moža na 100% harantavać, što kletki ŭ rotahłotcy nie mohuć być zaražanyja», — skazaŭ ekśpiert.
