Fota Depositphotos.com
Pymetrics — adna z kampanij u Ńju-Jorku, jakaja zajmajecca raspracoŭkaj prahramnaha zabieśpiačeńnia dla najmu na pracu. Štučny intelekt padbiraje pytańni i analizuje adkazy, kab vyjavić jakaści asoby i ŭzrovień intelektu kandydata, a taksama jaho schilnaści da ryzyki i chutkaść reakcyi. Pa słovach kampanii, štučny intelekt dapamahaje «dakładna i chutka vyjavić kahnityŭnyja i emacyjnyja charaktarystyki ŭsiaho za 25 chvilin».
Takoje prahramnaje zabieśpiačeńnie ŭžo vykarystoŭvajecca na pieršych etapach najmu ŭ takich transnacyjanalnych kampanijach, jak McDonald's, JP Morgan, PWC, Kraft Heinz. Druhi etap — sumoŭje z čałaviekam, kali štučny intelekt vyznačyć vas jak dobraha kandydata, paviedamlaje BBC.
«Meta ŭ tym, kab dapamahčy kampanijam razhledzieć bolš kandydataŭ i atrymać sihnały ad štučnaha intelektu, chto ź ich budzie paśpiachovym na toj ci inšaj pracy», — śćviardžaje Fryda Poli, zasnavalnica Pymetrics.
Raspracoŭkaj prahramnaha zabieśpiačeńnia dla padboru piersanału taksama zajmajecca amierykanskaja kampanija HireVue. Jaho sistema štučnaha intelektu zapisvaje videa kandydataŭ, jakija adkazvajuć na pytańni praz veb-kamieru i mikrafon svajho noŭtbuka. Potym štučny intelekt pieratvaraje huk u tekst, jaki paśla analizuje na najaŭnaść klučavych słoŭ. Naprykład, vykarystańnie zajmieńnika «ja», a nie «my» ŭ pytańniach pra kamandnuju rabotu. Na asnovie hetaha analizu pracadaŭca moža abo adchilić zajaŭku kandydata, abo pravieści ź im surazmoŭje ŭžyvuju.
Miarkujecca, što štučny intelekt zamienić 16% pracoŭnych miescaŭ u rekrutarskim siektary da 2029 hoda.
Kievin Parkier, dyrektar HireVue, pierakanany, što štučny intelekt značna bolš abjektyŭny za čałavieka ŭ acency kandydataŭ.
Pradstaŭniki Pymetrics śćviardžajuć, što sistema ich kampanii zabiaśpiečvaje spraviadlivaść. «Reziume moža dać infarmacyju ab prafiesijnych navykach, ale časta jakraz asabistyja jakaści pryvodziać da pośpiechu na pracy», — kaža Fryda Poli.
Adnak sistemy štučnaha intelektu dla najmu na pracu jašče majuć šmat prablem. Pa-pieršaje, uźnikajuć składanaści z tym, što štučny intelekt daloka nie zaŭsiody razumieje, što mienavita kaža čałaviek. Naprykład, hałasavyja pamočniki ad Google, Amazon ci Apple usio jašče nie zdolnyja razabrać šatłandski akcent. Taksama jany nie raspaznajuć niezvyčajnych słoŭ ci vyrazaŭ.
Pa-druhoje, štučny intelekt nie daje rady raspaznavańniu sensu taho, što skazaŭ kandydat. Treba ŭličvać siemantyku, kantekst i inšyja niuansy skazanaha, što pakul što pa siłach tolki homo sapiens.
