Biełaruskaja naftavaja kampanija zaklučyła doŭhaterminovy kantrakt z azierbajdžanskaj SOCAR Trading na pastaŭku syraviny na biełaruskija NPZ. Pra heta paviedamlaje TASS sa spasyłkaj na ahienctva Report.
Damova zaklučana na adzin hod z mahčymaściu padaŭžeńnia. Zhodna z kantraktam, SOCAR Trading budzie pastaŭlać biełaruskamu boku naftu z Azierbajdžana, a taksama ź inšych krain.
Abjomy pastavak pa novym kantrakcie nie nazyvajucca.
U sakaviku azierbajdžanskaja Dziaržaŭnaja naftavaja kampanija SOCAR adpraviła pieršuju partyju nafty Azeri Light pa kancernie «Biełnaftachim «praz Adeski port i naftapravod «Adesa — Brody». U tureckim porcie Džejchan pahruzili na tankier 90 tysiač ton nafty.
Napiaredadni stała viadoma ab tym, što Biełaruś damoviłasia ab pastaŭkach nafty z Rasii. Pa dadzienych krynicy, u pieršym kvartale hoda naša kraina atrymaje 4,5 miljona ton nafty. Infarmacyju ab zaviaršeńni pieramoŭ paćvierdziŭ i biełaruski premjer-ministr Raman Hałoŭčanka. Jon nie pryvioŭ paramietry pahadnieńnia, ale nazvaŭ ich vyhadnymi dla Mienska.
