Jak pravieści navahodniuju noč, kab nie zachvareć na karanavirus? Health.tut.by razam z doktaram ahulnaj praktyki Palinaj Kirko nahadvaje samyja prostyja praviły.
Fota Darji Burakinaj
— Pažadana sustrakać Novy hod z tymi, z kim vy žyviacie pastajanna — u vuzkim siamiejnym kole, kab nie raspaŭsiudžvać i nie pavialičvać kolkaść kantaktaŭ ź inšymi ludźmi, jakija patencyjna mohuć być nośbitami virusa. Pamiatajecie, navat u apošnija dni inkubacyjnaha pieryjadu čałaviek moža adčuvać siabie całkam zdarovym, ale ŭžo zarazić inšaha.
Kali vy žyviacie ź dziećmi i baćkami, to niama prablemy śviatkavać usim razam. Kali ž vašy pažyłyja svajaki žyvuć asobna, to lepš pavinšavać ich sa śviatam dystancyjna — pa telefonie ci jašče lepš z dapamohaj videasuviazi. Toje ž i z susiedziami: ich lepš pavinšavać paštoŭkaj u paštovuju skryniu abo padarunkam pad dźviery. Važna nie paddavacca emocyjam i nie całavacca abo abdymacca z usimi, kaho sustreniecie — navat kali heta vielmi blizkija ludzi.
Kali ŭsio ž sustrakajecie Novy hod z tymi, z kim nie žyviacie rehularna, nie zabyvajcie časta pravietryvać pamiaškańnie, pastajanna myć ruki z myłam nie mienš za 20 siekund i nie čapać rukami biez patreby tvar, vočy. U ideale ŭsim być u maskach, a taksama praduhledzieć rassadku, jakaja b dapamahła być na adlehłaści adno ad adnaho.
Ciapier ab prahułkach i masavych vychadach na vulicu ŭ navahodniuju noč. Biezumoŭna, dychać śviežym pavietram karysna i treba, u ideale rabić heta adasoblenaj kampanijaj, ź jakoj vy vyjšli z adnaho pamiaškańnia. Kali ŭsio ž vychodzicie na haradskija hulańni, to nie zabyvajcie hałoŭnaje praviła biaśpieki — dystancyjavacca na mietr-dva ad inšych ludziej.
Pry hetym u miescy, dzie dystancyja niemahčymaja, treba vykonvać masačny režym. Ale tut jość niuans: na vulicy ŭ chałodny pieryjad maska pacieje z unutranaj pavierchni, a heta spryjaje razmnažeńniu bakteryj i virusaŭ, jakimi pa vyniku vy budziecie dychać. Čym bolš bakteryj i virusaŭ udychajecca, tym vyšej ryzyka zachvareć, pryčym nie tolki na karanavirus, ale i na lubyja prastudnyja zachvorvańni.
Kali vychodzicie na vulicu i razumiejecie, što vy budziecie ŭ natoŭpie ludziej, dzie niama mahčymaści padtrymlivać dystancyju — treba karystacca maskaj, ale da momantu, pakul jana nie źbiare kandensat. Kali jana stanie syroj — abaviazkova zamianicie jaje na suchuju.
